मखुसा ……. दाउ थें जक जुइ !

देशय् न्हूगु सरकार वइ । आः देशय् राजनीतिक संक्रमणकाल अन्त्य जुइ । राजनीतिक अस्थिरता क्वचाइ । देशं स्थिर सरकार प्राप्त याइ । देय् आः आर्थिक समृद्धिपाखे न्ह्याः वनी । लम्के जुइ । देय् विकासया लँय् दत्तचित्त जुयाः न्ह्याः वनी । न्हूगु सरकार अले सरकारय् संलग्न दलतय्सं थौंकन्हय् आर्थिक उन्नतिया तीव्र नारा बी । देशं याकनं आर्थिक चमत्कार यायेत्यंगु दु । विश्वास थनी ।

वाम एकताया होहल्ला गाक्कं जुयाच्वंगु दु । तर निगू वाम दल छगू मजूनि । निगू वाम दल सतिना वयाच्वंगु दु । निगू दल जानाः सरकार निर्माण जुल कि जरुर स्थिर सरकार खनेदइ । वइ । छथ्वः जनतां विश्वास कयाच्वंगु दु । मेखेर देशय् नेतातय् विगतया राजनीतिक चरित्र स्वयाः, खंकाः, स्थिर सरकार जुइ, वइ, धइगु खँय् शंका याइपिं नं दइ । पिने एकताया खँ खनेदइ । दुनें दुनें अनेक गुटवाजी, अनेक फुटया आशंका नं पिहां वइ । उकिं राजनीतिं निश्चित लँ मज्वंतले स्थिर सरकार वइ, संक्रमणकाल फुइ । विश्वास यानाः धुक्क जुइगु थाय् मवःनि । पी मानी । स्वयेमानी ।

सरकारय् वयेगु इलय् न्ह्यागु सरकारं नं ततःधंगु वाचा ल्हाइ । याइ । संकल्प ब्वइ । औपचारिकता क्यनी । ‘छुं जुइन ला !’ धइगु आशा जनताय् थनेत स्वइ । तर निला प्यला फुइ । बहालिया घडीइ याःगु वाचा प्रतिज्ञा फुक्कं हाफः जुइ । आकाशाय् तनी । न्हापांखुसी प्रधानमन्त्री जूगु इलय् वर्तमान प्रधानमन्त्री ओलीं खुसि पुलेत तयातःगु ग्यानापुसे च्वंगु तुइनत दुगु थासय् झोलुंगे ताँ तये । बचं बिउगु खः । तर वय्कःया उगु कार्यकालय् वय्कःया बचं गुलि प्रतिशत कार्यान्वयन जुल थें ? अनिश्चित । केपी ओलीजु आः हाकनं प्रधानमन्त्री जुयादिल । देय्यात आर्थिक समृद्धि यायेगु जोडदार प्रतिवद्धता वय्कलं क्यनादीगु दु ।

न्हापांखुसी प्रधानमन्त्री जूगु इलय् वर्तमान प्रधानमन्त्री ओलीं खुसि पुलेत तयातःगु ग्यानापुसे च्वंगु तुइनत दुगु थासय् झोलुंगे ताँ तये धयागु बचं बिउगु खः । तर वय्कःया उगु कार्यकालय् वय्कःया बचं गुलि प्रतिशत कार्यान्वयन जुल थें ? अनिश्चित ।

वय्कःया थुगु कार्यकाल न्हापा स्वयां पाइ । वाम एकताया कारणं वय्कःयात ज्या यायेत बहुमत दइ । धाथें एमाले–माओवादी छगू हे पार्टी जुया वन धाःसा केपी ओलीजुया सरकार बल्लाइ । वय्कलं इच्छा याःगु नीति कार्यान्वयन याये फइ । अःपुइ । सुगम जुइ । प्रचारय् वइ । आः न्हूगु सरकारं आर्थिक समृद्धियात प्राथमिकता बी । घोषणा याइ । थ्व नारा स्वागत योग्य जुइ । तर आम जनतायात मात्र आर्थिक समृद्धिया नारां जक आकर्षणया निंतिं पर्याप्त जुइ मखु । आम जनताया न्यूनतम आवश्यकता पूर्ति यायेया लागि सरकारया आर्थिक समृद्धिया ज्याझ्वःत गुलि कल्याणकारी खः ? स्पष्ट जुइमाः । देशय् जुइगु आर्थिक उन्नतिया लक्षित समूह जबतक सामान्य पीडित जनता जुइ फइमखु, व आर्थिक उन्नति सामन्त, पूँजीपतितय् निंतिं जक जुइ । आम जनताया निंतिं व लाभदायक जुइमखु । छुं प्रयोजनया निंतिं नं जुइमखु ।

आः एमाले व माओवादी छगू हे जुल कि व छगू जूगु दलया नां ‘नेपाल कम्युनिष्ट पार्टी’ जुइ । बय्बय् जुयाच्वंगु दु । खतुं वाम एकता धायेबलय् उकिया सैद्धान्तिक अर्थ उलि निश्चित खने दइमखु । ‘वाम’ खँग्वःया अर्थ बहुल जुइ । छगू हे जक खने दइमखु । ‘वाम’या अर्थ केन्द्रया देपापाखे धइगु जुइ । संस्थापन पक्षलिसे विपक्ष, विद्रोही जुया लुइगु पक्षयात ‘वाम’ धाइ । कांग्रेस पार्टी नं न्हापा वामपन्थी कांग्रेस धइगु दु । वामपन्थी कांग्रेसया अर्थ माओवादी वा एमाले कांग्रेस धाःगु खः । कांग्रेसय् प्रगतिशील पक्षधरया संकेत थ्वं याइ । वाम धकाः कम्युनिष्ट अर्थय् नं छ्यः । तर कम्युनिष्ट दलय् नं दक्षिणपन्थी व उग्रपन्थी धइगु खँ दइ । मोहन वैद्य, विप्लवपिंत ला तुलनात्मक रुपं हे वाम उग्रपन्थी खंकी । उदारवादी वामपन्थीतय्त दक्षिणपन्थी वामकथं नं खंकू । खंकी । वाम एकताया खँग्वः छ्यलाय् सैद्धान्तिक अन्यौल, अस्पष्टता थने फुगु सम्भावना खने दइ ।

आः वाम एकता नेपाल कम्युनिष्ट पार्टीया नामं प्रकट जुइ । प्रचारय् वइ । खतुं कम्युनिष्ट पार्टीइ नं थौंकन्हय् दक्षिणपन्थी, वामपन्थी धइगु विभाजन खनेदु । खनेदइ । तर कम्युनिष्ट पार्टीया नामं पिहां वइगु खःसा आः वइगु सरकारं काइगु आर्थिक नीतिया सैद्धान्तिक आधार सी दयेमाः । कम्युनिष्ट पार्टीं नालीगु आर्थिक नीति गुगुं वर्गया निंतिं जुइ । जुइमाः । वया वस्तुगत आधारत दइ । मखु पार्टीया नां लहडया नितिं वा चुनाव त्याकेत जक तयेगु खःसा व मेगु हे जुइ । आः वइगु सरकार नेपाल कम्युनिष्ट पार्टीया नामं न्ह्याः वनीगु खःसा सरकारं नालीगु आर्थिक समृद्धिया आजु सु जुइ ? छु जुइ ? स्पष्ट यायेमाः । कार्यान्वयन नं व हे अनुरुप जुइमाः । मखुसा दलया ब्रान्ड नां मियाः थःगु स्वार्थ पूवंकेगु दाउ थे जक जुइ पार्टीया नामाकरण । मात्र भोट फयेगु भ्यगः ।

सम्बन्धित बुखँ

LEAVE YOUR COMMENTS