विश्वकप २०१८

एमाले माओवादी दथुइ न्हय्गू बुँदाया सहमति

नेतृत्वया खँ सहमति पत्रय् दुमथ्यात

येँ एमाले व माओवादी पार्टी एकताया निंतिं न्हय्गू बुँदाया सहमति जूगु दु । सोमवाः बहनी लिबाक्क प्रधानमन्त्री निवास बालुवाटारय् जूगु एकता संयोजन समितिया बैठक लिपा एमाले अध्यक्ष केपी ओली व माओवादी अध्यक्ष प्रचण्डं सहमति पतिइ हस्ताक्षर यानादीगु खः ।
न्हय्गू बुँदाया सहमति पत्रय् सरकारया नेतृत्व, पार्टीया नेतृत्व बारे छुं खँ न्ह्यथनातःगु मदु । थ्व खँय् निम्ह नेतातय् दथुइ भद्र सहमति जक यानाः लिखित रुपं मतयेगु सहमति न्हापा हे जूगु खः ।

न्हय्गू बुँदाया सहमति पत्रय् पार्टीया नो नेपाल कम्युनिष्ट पार्टी जुइगु, पार्टीया निर्देशक सिद्धान्त माक्र्सवाद व लेनिनवाद जुइगु, एमालें नाला वयाच्वंगु ‘जनताको बहुदलीय जनवाद’ (जबज) व माओवादी नाला वयाच्वंगु ‘माओवाद व एक्काइसौं शताब्दीइ जनवाद’ सहलह यानाः आवश्यक परिमार्जन, विकास याना यंकेफइगु, थ्व हे आधारय् अन्तरिम राजनीतिक प्रतिवेदन व अन्तरिम विधान तयार यानाः व हे आधारय् एकीकृत पार्टी संचालन यायेगु, सामाजिक आर्थिक रुपान्तरण मार्फत समाजवादया आधार निर्माण यायेगु, वइगु पार्टी महाधिवेशनयात एकता महाधिवेशन कथं यंकेगु खँ न्ह्यथनातःगु दु ।

सहमति पत्रय् एमालेपाखें नेतात माधवकुमार नेपाल, झलनाथ खनाल, वामदेव गौतम, इश्वर पोखरेलं सही यानातःगु दु, माओवादीपाखें नेतात नारायणकाजी श्रेष्ठ व रामबहादुर थापां सही यानातःगु दु ।

सम्बन्धित बुखँ

LEAVE YOUR COMMENTS