विश्वकप २०१८

छेँ जग्गा कर प्रदेश‌ म्हइगु

येँ- करदाताप्रति सम्मानपूर्वक व्यवहार यासें कर निर्धारण व असुली यायेगु अधिकार प्रदेश सरकारयात बिउगु दु । छेँ, जग्गा रजिष्ट्रेसन शुल्क, मनोरञ्जन, विज्ञापन व कृषि आय कर काये दइगु अधिकार प्रदेशयात प्रत्यायोजना यानागु खँ अर्थ मन्त्रालयं धाःगु दु ।

नेपाःया संविधाना धारा १८७ कथं प्रदेशया कर व गैरकर राजश्व म्हयेगु सम्बन्धय् दयेकूगु नमूना विधेयकय् प्रदेशया कर कार्यालयं कर पुलेमाःम्ह व्यक्ति वा करदाता म्हसीकाः कर दायित्व विवरण खुले यानाः कर म्हये फइगु व्यवस्था दु ।
संविधान कथं न्हय्गुलिं प्रदेशय् प्रदेश सरकार नीस्वने धुंकूगु अवस्थाय् अर्थ मन्त्रालयं कर सम्बन्धी नमूना कानुन प्रदेशय् छ्वःगु खः । उगु कानुनय् सरकारं थःगु क्षेत्र दुनेया छेँ, जग्गाया रजिष्ट्रेशन यायेबलय् शुल्क म्हयेफइगु व्यवस्था यानातःगु दु ।

विधेयकया परिच्छेद–४ या कर सम्बन्धी व्यवस्था कथं छेँ, जग्गाया स्वामित्व हस्तान्तरण यायेबलय् शुल्क बुझे यायेमाःगु व्यवस्था यानातःगु दु । उगु शुल्क निर्धारण यायेबलय् कर पुलेफइगु क्षमताया आधारय् कर निर्धारण यायेमाः ।

अथेहे कर प्रणाली समानता व न्यायय् आधारित जुइगु कथं सरल, पारदर्शी व मितव्ययी जुइमाःगुया लिसें नागरिकयात सुविधा जुइकथं कर कायेमाः । छेँ जग्गाया स्वामित्व हस्तान्तरण यायेबलय् मिसापिंत २५ प्रतिशत छुट बीमाःगु व्यवस्था यानातःगु दु ।

कानुन कथं प्रदेशयात सवारी साधन कर लगे यायेफइगु अधिकार बिउगु दु । इन्धनपाखें सञ्चालन जुइगु फुक्कं सवारी साधनय् प्रदेश सरकारं कर म्हये फइ ।
प्रदेश सरकारयात मनोरञ्जन कर तकं म्हये फइगु अधिकार बिउगु दु । प्रदेश सरकारं हल, भिडियो क्यनीगु छेँय् साँस्कृतिक मनोरञ्जन कर म्हयेफइगु व्यवस्था यानातःगु दु ।

अथेहे यानाः सरकारपाखें अनुमति कयातःगु विज्ञापन एजेन्सीं विज्ञापनया कारोबार याःगु व विज्ञापनया सामग्री तःगु वापत कर म्हये फइगु व्यवस्था दु । अथेहे कृषिइ आयकर लगे यायेफइगु व्यवस्था दु ।

कर बापत म्हःगु ध्यबा मध्ये २ प्रतिशत प्रशासनिक खर्च कटे यानाः ल्यं दुगु राजश्व क्वछिनातःगु ईया दुने सञ्चित कोषय् जम्मा यायेमाःगु व्यवस्था यानातःगु दु । स्थानीय तहलय् म्हयातःगु शुल्क नं उकथं यायेमाः । उकथं हे विधेयकया परिच्छेद–१४य् गैरकर राजश्व म्हयेफइगु व्यवस्था यानातःगु दु । थुकिया लिसें सेवा शुल्क व दस्तुर, पर्यटन शुल्क तकं म्हये फइगु व्यवस्था दु । थ्व नं प्रदेश सरकारया आम्दानी जुइ ।

कर सम्बन्धी कानुन दयेकेत प्रदेशं केन्द्र सरकार लिसे समन्वय यायेमाःगु व्यवस्था दु । अथेहे स्थानीय तह व नेपाल राष्ट्र बैंक लिसे नं समन्वय यानाः कर निर्धारणया निंतिं कानुन दयेकेमाःगु व्यवस्था दु ।

नेपाःया संविधानया धारा ५९ व २१३ कथं थ्व स्वयां न्ह्यः अर्थ मन्त्रालयं प्रदेश सञ्चित कोष, सरकारी कोषया सञ्चालन, बजेट तर्जुमा, निकासा व खर्च यायेगु, लेखा तयेगु अधिकार सहित प्रदेश आर्थिक कार्यविधि ऐन २०७४ नमूना विधेयक पारित यानाः प्रदेशय् छ्वयेधुंकूगु दु ।

सम्बन्धित बुखँ

LEAVE YOUR COMMENTS