३ नम्बर प्रदेशपाखें ३ गू आशा

सम्पादकीय

नेवाःतय्गु बाहुल्यता दुगु प्रदेश नम्बर ३ पाखें नेवाःतय्सं ३ गू हे आशा याःगु खः – प्रदेशया मुख्यमन्त्री, प्रदेशया नां व प्रदेशय् छ्यलाबुलाया भाय् । प्रदेशया मुख्यमन्त्री नेवाः हे जुइ धकाः भयंकर हे आशा याःगु खः । तर जूबलय् मेम्ह हे वल । नेवाः मवः । नेवाःत जिल्ल । थ्व देशय् नेवाःत प्रधानमन्त्री जुइत ला लायक मजुल मजुल, मुख्यमन्त्री जुइत तकं लायक मजुइधुंकल खनिं । न्हापांगु आशा ‘मिस फायर’ जुल ।आः प्रदेशया नां छु जुइ धइगु निगूगु आशा चर्चाय् वयाच्वंगु दु । नेवाःतय्गु आशा खः, प्रदेशया नां नेवाः प्रदेश हे जुइमाः ।

मखुसा नेवाः–ताम्सालिङ जूसां जिउ । उलि नं मजूसा नेपालमण्डल जक जूसां जिउ । तर थौंकन्हय् चर्चाय् वयाच्वन, ३ नम्बर प्रदेशया नां पशुपति प्रदेश जुइमाः, अथवा बागमति प्रदेश जुइमाः, वा नारायणी प्रदेश जुइमाः । नेवाः प्रदेश ला गनं गन का । ३ नम्बर प्रदेश दुने ‘नेवाः प्रदेश’ पक्षधर शक्ति ल्हातय् निनेत हे मगाः । उकिं निगूगु आशा नं सुथां लाइगु संकेत मदु ।

आः गन तक नेवाः भाय्यात छ्यलाबुलाया भाय् दयेकेगु धाःगु स्वंगूगु आशाया खँ दु, यल महानगरपालिकाया मेयर चिरिबाबु महर्जनया खँ न्यनेबलय् थ्व नं जुइ ला मजुइ ला धाये फइगु अवस्था मखं । छाय्धाःसां नेवाः भाय्यातछ्यलाबुलाया भाय् धकाः मान्यता जक बियां छु याये, छ्यलाबुला याः वःपिं हे मदु ! छ्यलाबुलाया मान्यता बीधुंकाः नं छ्यलीपिं मंत धाःसा व ति तःधंगु बेइज्जत मेगु जुइ ला ?

सम्बन्धित बुखँ

LEAVE YOUR COMMENTS