‘वाटर लू’ जुया बिल ओलीया बोली

नेपाः संघीयताय् प्रवेशया अनेक चरण न्ह्यानाच्वंगु जुल । बहुसंख्यक आदिवासी जनजाति दुगु देशय् संघीयता वास्तविकरुपं हे फलिफाप जुइगु खः कि थ्व नं छगू जाति व समूहया निंतिं क्यनेगु वा जुयाः आदिवासी जनजातितय्गु अस्तित्व हे न्हंकेगु षडयन्त्र जकं जुइगु खः धइगु आशंका जुया वयाच्वंगु दु । नेपाः देश निर्माणय् थनया मूलवासीतय्गु तःधंगु मेहनत दुसा लिपा पिनें बसाइँ सराई जुयावःपिं मनूतय्सं राज्य सत्ता थःगु ल्हातिइ लाकेधुंकाः थनया मूलवासीतय्त हरेककथं उत्पीडनय् तयाः उमित शासन यायेगु ज्या न्ह्याकाच्वंगु दु ।

मूलवासी व आदिवासीतय्गु कला सभ्यतायात नालाः थःपिं सभ्य धायेकाच्वंगु दुसा आः वयाः अज्याःगु हे सभ्यता व कलायात नष्ट यानाः सम्पदाया सिर्जना नं थःपिनिगु हे खः धकाः भ्रम ब्वलंकेगु ज्या समेत याना वयाच्वंगु दु । नेपाःया सत्ता शासनया इतिहासय् थनया मूलवासी नेवाःत न्ह्याबलें हे पीडित जुयाच्वंगु दु । नेपाः देशया नां तकं हे थनया मूलवासी नेवाःतय्गु आधारय् जूगु खँ इतिहास प्रमाणित खःसा आः वयाः न्हूगु संविधान निर्माणय् मुलुकया छुं नं जातिया पहिचानया अस्तित्व तकं मल्यंंकेगु ज्या जुयाच्वंगु मदु ।

स्वनिगः नेपाल मण्डलया मूलवासी नेवाःत जूगु व नेपाः देय्या राजधानी येँ हे नेवाःतय्गु मूल वसोवासया थाय् जूगु कारणं आःया न्हूगु संविधानकथं थनया प्रदेशया नां नेपाल मण्डल व थनया मुख्यमन्त्री थनया हे मूलवासी ‘नेवाः’ जुइमाः धकाः थनया मूलवासी नेवाःतय्सं शुरुंनिसें हे अभियान न्ह्याका वयाच्वंगु खः । थ्व हे भावनायात कदर यासें प्रभावशाली राजनीतिक पार्टीं थः पार्टी दुनेया उपाध्यक्ष व वरिष्ठ नेतृ अष्टलक्ष्मी शाक्ययात थुगु प्रदेशया मुख्यमन्त्रीया उम्मेदवारकथं निर्वाचनय् थने हःगु खः ।

वरिष्ठताया लिधंसाय् प्रतिनिधि सभाया उम्मेदवार जुइमाःम्ह मय्जु शाक्यं प्रादेशिक सभाया उम्मेदवार जुइत नं थ्वहे खँया लिधंसाय् सहजकथं कयादीगु खः । नेवाःतय्गु आदिभूमिइ छम्ह नेवाः हे मुख्यमन्त्री जुइगु खँय् विश्वस्त जुयाः पार्टीया नीति व सिद्धान्तयात तकं वास्ता मयासें सर्वसाधारणं ब्यापकरुपं मय्जु शाक्ययात नेतृया रुपय् स्वीकार यानाः प्रदेश नम्बरय् ३ य् मतदान याःगु खः । वय्कःयात जक मखु, उगु पुचःया सम्पूर्ण उम्मेदवारतय्त हे नं थ्वहे विश्वासं मतदान यानाः विजयी याना बिउगु खः । तर पार्टीया आन्तरिक चलखेलया कारणं थ्व फुक्कं विश्वास ध्वस्त जूवंगु दु ।

नेपाःया राजनीतिक परिवर्तनय् नेता कार्यकर्ताया रुपय् नेवाःतय्गु महत्व व प्रभावकारी भूमिका दुगु खँय् शंका मदु । प्रदेश व प्रतिनिधि सभाया निर्वाचनय् दकलय् तःधंगु पार्टी जुइत ताःलाःगु नेकपा (एमाले)यात थुगु थासय् तक थ्यंकेगु निंतिं नं देय्या बहुसंख्यक आदिवासी जनजातितय्गु महत्वपूर्ण भूमिका दु । तर थ्व सम्पूर्ण खँयात वेवास्ता यासें पार्टीया हे छगू ईया घोषित बचंकथं प्रदेश नं. ३ या मुख्यमन्त्री थनया रैथाने नेवाःयात दयेकेगु थासय् छम्ह ब्रम्हूयात दयेकाः थुगु पार्टीं थःगु चरित्र ह्वातां याना बिउगु दु ।

‘त्याइगु खःसा हे जक दँ’ धकाः पार्टी अध्यक्षया बोलीया गाम्भीयर्ताया थुइके मफयाः थ्व हे बोली अष्टलक्ष्मीया निंतिं ‘वाटर लू’ जुया बिउगु दु, गन वयागु पार्टी प्रतिया सम्पूर्ण समर्पण व आस्थाया हत्या जुया बिउगु दु । तर अथे खःसां अष्टलक्ष्मी प्रदेश नं. ३ या निर्वाचित प्रमुख जूगु कारणं थनया आदिवासी नेवाःतय्गु आपालं हक अधिकार सुरक्षित व संरचित यायेगु मौका अझं ल्यनाच्वंगु दनि । थज्याःगु ज्याया लिच्वः छु जुइ व दीर्घकालीन लिच्वः गुकथं लाइ धयागु सोच थुकथंया निर्णय यायेगु साहस याःपिंसं मयागु खइ मखु ।

तर थःपिंत हे सर्वेसर्वा तायेकाः देय्या अथाह शक्ति आदिवासी जनजातितय्गु अस्तित्व तकं स्वीकार मयायेकथंया थुज्वःगु ज्यां लिपा वनाः थुगु पार्टीयात दीर्घकालीन असर जुइगु खँय् शंका मदु । न्हूगु संविधानय् दयाच्वंगु पहिचानया मुद्दायात कमजोर यानाः पहिचानया आन्दोलनयात हे निस्तेज यायेत स्वयाच्वंम्ह नेकपा एमाले आःया इलय् सफल थें खने दयाच्वंगु दु । थःपिं शक्ति सम्पन्न जुइवं हे नेवाः पहिचानया मुद्दा लगायत आदिवासी जनजनाति व महिला सशक्तीकरणया आन्दोलनयात हावा नका बिउगु दु ।

थ्व नियोजित हे खः धयागु खँ आः चर्चाय् वयाच्वंगु अष्टलक्ष्मीया उम्मेदवारीया चर्चा व थुकी अध्यक्ष केपी ओलीया स्वीकृतिया समाचारं पिदनाच्वंगु दु । आदिवासी जनजाति, महिला सशक्तीकरणया मुद्दा कमजोर यायेगु निंतिं हे थःपिंसं मुख्यमन्त्रीया उम्मेदवारकथं न्ह्यःने हःम्ह अष्टलक्ष्मी विजयी जुया वयेधुंकाः नं मेम्ह हे मनूयात मुख्यमन्त्रीया उम्मेदवार न्ह्यःने हयाः मतदातातय्त ‘विश्वासघात’ याःगु बिचाः आम मतदातातय्सं याना वयाच्वंगु दु ।‘नेवाः प्रदेश’ व ‘नेवाः प्रदेशय् नेवाः मुख्य मन्त्री माः’ धकाः नेवाःतय्गु मानसिकताय् लाल कयाच्वंपिं नेवाः अधिकारकर्मी धकाः जुयाच्वंपिं अधिकारकर्मीत गुलि फुस्कुलु धयागु खँया स्थिति नं थुइका काये फइ ।

‘नेवाः मुख्य मन्त्री माः’ धकाः इलय् ब्यलय् सभा सम्मेलन याना जुइपिंसं आः नेवाः मुख्यमन्त्री मजुइवं म्होति निं ध्यानाकर्षण पौ तकं पित बीगु हैसियत मुंके मफुपिंसं नेवाः आन्दोलनया अनेक बहानाया सभा सम्मेलनं नेवाःतय्गु मनस्थिति झन हे जक कमजोर जुया वनाच्वंगु खँयात वाः चायेकेमाः । नेवाःतय्गु आदिभूमि नेवाःतय्गु वर्चस्वया निंतिं क्वथा व होटलय् भाषण जक मखु, थुकियात निक्र्यौल हये फइकथंया ज्याझ्वःत पित हयाः नेवाःतय्गु आत्मसम्मान थहां वइगु ज्या सकल नेवाः अधिकारकर्मीतय्सं यायेमाः ।

सम्बन्धित बुखँ

LEAVE YOUR COMMENTS