राष्ट्र बैंक नं संघीय संरचनाय् वनीगु तयारी

येँ – नेपाल राष्ट्र बैंकयात नं संघीय संरचनाया ढाँचाय् यंकेगु निंतिं सहलह न्ह्याःगु दु । संघीयता दुगु देय्या केन्द्रीय बैंकया सञ्चालन व संरचनाया विषय जूगु अभ्यासयात आधार दयेकाः पुनर्संरचनाया निंतिं सहलह जूगु खः । संघीय ढाँचा कथं केन्द्रीय बैंकयात पुनर्संरचना यायेगु निंतिं सुझाव बीत नेपाः व श्रीलंकाया विज्ञ दुथ्याःगु परामर्शदाता युनासीडीं बुधवाः सहलह ज्याझ्वःया ग्वसाः ग्वःगु खः । केन्द्रीय बैंकयात संघीय संरचनाय् यंकेगु बारे सहलह जुयाच्वंगु खँ राष्ट्र बैंकया प्रवक्ता नारायणप्रसाद पौडेलं कनादीगु दु । बुधवाःया बैठकय् केन्द्रीय बैंकयात संघीय संरचनाय् यंकेत सञ्चालन विधि व विभाग गुलि व गज्याःगु धइगु बारे आन्तरिक सहलह जूगु खः ।

देय् संघीय प्रणालीइ वनेधुंकूगु व राज्यया फुक्कं अंग नं उगु हे कथं न्ह्याकायंकेगु तयारी जुयाच्वंगु इलय् केन्द्रीय बैंकयात नं संघीय संरचना कथं न्ह्याकेमाःगु सः थीथी थासं तयेगु याना वयाच्वंगु खः । सहलहया झ्वलय् कार्यकारी निर्देशकयात नं पदोन्नत्ती यानाः सहायक डेपुटी गभर्नर दयेकेगु विषयय् नं सहलह जूगु दु । प्यम्हेसित सहायक डेपुटी गभर्नर दयेकेगु बारे सहलह जूगु खःसां नं उकिया निर्णय धाःसा मजूनि । थौंकन्हय् राष्ट्र बैंकय् १८ म्ह कार्यकारी निर्देशक दुसा उपिं मध्ये निम्हेसित डेपुटी गभर्नर दयेकेगु यानाच्वंगु दु । गभर्नर पिनें नियुक्ती याःसां नं डेपुटी गभर्नर धाःसा कार्यकारी निर्देशकपाखें नियुक्ती यायेगु यानाच्वंगु दु ।

सम्बन्धित बुखँ

LEAVE YOUR COMMENTS