गोरखा दरवार ठेक्कां दयेकीगु

येँ – प्यसःदँ पुलांगु गोरखा दरवार ठेक्कां दयेके बीगु जूगु दु । ठेकेदारयात दरवार दयेकेगु ठेक्का बीगुया नापनापं जगंनिसें दरवार थुनेगु ज्या नं शुरु जूगु दु । पृथ्वीनारायण शाहया थ्व दरवार वंगु तःभुखाचं क्षति याना बिउगु खः । अबले गोरखायात हे केन्द्र दयेकाः भुखाय् ब्वःगु खः । पचली सिभा जेभी कम्पनीं दरवार दयेकेगु ठेक्का लाकूगु दु । थ्व कम्पनीं ४ करोड ३७ लाख तकां दरवार दयेकेगु कबुल याःगु खः । स्वदँया दुने दरवार दयेके सिधइगु ग्वसाः दु ।

‘वि.सं. १६८६ स गोरखाया जुजु राम शाहया पालय् थ्व दरबार दयेकूगु खः । आः थुकियात जगंनिसें पूवंक हे थुनाः हानं न्हापा थें हे दयेकेगु ग्वसाः जुयाच्वंगु दु । दरवार दयेकेगु ज्या धाःसा पुरातत्व विभागपाखें याःगु खः । दरवार दयेकीबलय् पुलांगु ज्या वःगु ज्वलंत पुलांगु हे छ्यलीगु खँ धाःगु दु ।
दरवार दयेके ज्या न्ह्याःगुलिं अन च्वंगु पृथ्वीनारायण शाहया गद्दी लगायत मेमेगु ज्वलंत मेथाय् हे सुरक्षितपूर्वक तये यंकूगु दु ।