२० न्हुया दुने मेलम्चीया सुरुङ म्हुइ क्वचाइगु

येँ- मेलम्ची खानेपानी आयोजनाया दकलय् महत्वपूर्ण ज्या सुरुङ म्हुइगु ज्या वइगु २० न्हुया दुने क्वचाइगु (ब्रेक थु्र) जुइगु खँ धाःगु दु । सुरुङ म्हुइ ल्यं दयाच्वंगु ग्यालथुम निसें सिन्धु तकया ९ किलोमिटर सुरुङ मध्ये आः २४० मिटर जक म्हुइ ल्यं दनि । थन न्हिं १२ मिटरया ल्याखं सुरुङ म्हुइगु ज्या जुयाच्वंगु दु ।
थ्वयां न्ह्यः अम्वाथाननिसें ग्यालथु तक थ्यंमथ्यं ९ किमि व सुन्दरीजलनिसें सिन्धु तक ९ किमिया सुरुङ म्हुइगु ज्या क्वचायेधुंकूगु दु । थ्व आयोजनाय् मुक्कं २७.५ किलोमिटर सुरुङ मार्ग दु ।

काठमाडौं उपत्यका खानेपानी लिमिटेडया झिक्वःगु वार्षिकोत्सवया लसताय् जूगु ज्याझ्वलय् न्ववानादिसें खानेपानी तथा सरसफाइ मन्त्री महेन्द्र यादवं छुं अवरोध मवल धाःसा वइगु २० न्हुया दुने सुरुङ म्हुइगु ज्या क्वचाइगु खँ धयादीगु खः ।
मेलम्चीं आयोजनां स्वनिगलय् न्हिं १७ करोड लिटर लः हयेगु योजना दु । थुलि लः वःसां स्वनिगःवासीया निंतिं धाःसा अझं ३४ करोड लिटर लः अभाव जुइगु खँ धाःगु दु ।

ज्याझ्वलय् न्ववानादिसें खानेपानी तथा सरसफाइ राज्यमन्त्री अब्दुर रज्जाकं स्वनिगवासीपिनि छेँय् छेँय् लःया हिति दु, तर लः मवःगु अवस्था मवयेकेत मेलम्ची आयोजना पूवंकेगु ज्याय् सकस्यां ध्यान वनेमाः धयादीगु दु ।
ज्याझ्वलय् कम्पनीया उत्कृष्ट मिटर रिडरपिं अमृतमणि दाहाल, मदन महर्जन व सन्तोष ओझायात नं सम्मान याःगु खः ।

सम्बन्धित बुखँ

LEAVE YOUR COMMENTS