सगरमाथाया जाः नापे यायेगु ज्या न्ह्यात

येँ – विश्वया दकलय् तजाःगु च्वापुगुँ धयातःगु सगरमाथाया जाः नापे यायेगु ज्या शुरु जूगु दु । नेपाःया नापी विभागं थ्व जाः नापे यायेत सिरहा जिल्लाया मिर्चैयांनिसें ज्या शुरु याःगु खः ।

थ्व ज्याया लागिं आःयात १६ म्ह प्राविधिक खटे जूगु दु । मिर्चैयांनिसें पलाः पलाःया उचाई नापे यायां वनाः सोलुखुम्बुया ताक्सिण्डो तक नापे याना वनी । वयां लिपा हानं मेगु विधिपाखें सगरमाथाया च्वका नापे यायेगु शुरु जुइ ।

थुकी समुद्र सतहनिसेंया उचाई नापे यायेत धाःसा भारतया ग्वाहालि काइगु जूगु दु । नेपालं न्हापा थ्व ज्याय् भारतया छुं हे ग्वाहालि काये मखु धाःगु खःसां समुद्र धाःसा नेपाःयाके मदुगु जुयाः भारतया ग्वाहालि कायेत्यंगु खः । भारतं समुद्री सतहनिसें नेपाःया सीमाय् लाःगु मजार धाःगु थाय् तकया उचाई नापे यायेगु जिम्मा काःगु दु ।

नेपालं मुक्कं निदँया दुने थ्व जाः नापे याये सिधयेकेगु ताः तःगु दु । निदँ न्ह्यः थुकिया खर्च करिब १५ लाख डलर तुइगु अनुमान यानातःगु खः । आः १६ म्ह जक प्राविधिक थुकी सहभागी जूगु खःसां अन्तिम तकया दुने थुकी ८० म्ह विज्ञत सहभागी जुइगु खः नापी विभागया महानिर्देशक गणेशप्रसाद भट्टं कनादीगु दु । नेपालं नापे याःगु थ्व जाःयात विश्वं मान्यता बीकेगु लागिं दथु दथुइ विदेशी विज्ञतय्त नं सहभागी याकेगु ग्वसाः नं नेपालं तयातःगु दु ।

वि.सं. २०७२ सालया तःभुखाय् लिपा सगरमाथाया जाः थपघट जूगु जुइफु धइगु खँ पिहां वःगुलिं नेपालं थ्व जाः नापे याःगु ज्या याःगु खः ।
थ्व स्वयां न्ह्यः सन् १९९९ स अमेरिकाया नेशनल जोग्राफिक सोसाइटीं सगरमाथाया जाः नापे यानाः ८८५० मिटर दु धकाः लिच्वः पिकाःगु खःसा वयां लिपा चीनया छगू पुचलं जाः नापे यानाः ८८४४ मिटर धकाः पिकाःगु खः । नेपालं थ्व निगुलिं लिच्वःयात अस्वीकार याःगु दु । सन् १९५५ निसें सगरमाथाया जाः ८८४८ मिटर कायम जुया वयाच्वंगु दु ।

सम्बन्धित बुखँ

LEAVE YOUR COMMENTS