सुर्यविनायक नगरपालिकाया दक्वं विद्यालयया व्यवस्थापन समिति भंग

ख्वप– थनया सूर्यविनायक नगरपालिकाय् च्वंगु दक्वं सामुदाकि विद्यालयया व्यवस्थापन समिति भंग याःगु दु । नगरपालिकां थःगु नगर लागाय् च्वंगु विद्यालय व्यवस्थापन समिति भंग याःगु खः । माध्यमिक तह तकया शिक्षाया अधिकार स्थानीय तहया सरकारया मातहतय् वयेवं नगरपालिकां विद्यालयया शिक्षण गुणस्तर वृद्धि यायेगु धासें विद्यालय व्यवस्थापन समिति भंग याःगु खः । नगरप्रमुख वासुदेव थापां विद्यालयया गुणस्तर वृद्धि याना यंकाः व्यवस्थापनयात चुस्त यायेगु ल्याखं व्यवस्थापन समिति भंग यानागु जानकारी बिउगु दु ।

विद्यमान विद्यालय व्यवस्थापन समिति भंग याये धुंकाः आः सम्बन्धित वडाअध्यक्ष वा वडासदस्य मध्ये छम्ह व्यवस्थापन समितिया अध्यक्ष जुइगु जूगु दु । वंगु पुस २८ गते च्वंगु नगरसभां पारित याःगु शिक्षा नियमावलीकथं विद्यालय व्यवस्थापन समितिय अध्यक्ष सम्बन्धित वडाया वडा अध्यक्ष व सदस्यपाखें छम्ह जुइगु व्यवस्था याःगु खः। थ्व हे व्यवस्थाकथं विद्यमान व्यवस्थापन समिति भंग याःगु खः ।

सूर्यविनायक नगरपालिका दुने न्यय्खुगू निजी विद्यालय संचालन जुयाच्वंगु दुसा पीगू सामुदायिक विद्यालय दु । नगरपालिकाया लिपांगु निर्णयलिसें आः न्हूगु व्यवस्थापन समिति गठन यायेगु प्रक्रिया नं शुरु जूगु दु । पुलांगु व्यवस्थापन समिति भंग याये धुंकाः सामुदायिक विद्यालयय् न्हूगु व्यवस्थापन समिति गठन यायेगु प्रक्रिया न्ह्याये धुंकूगु नगरपालिकाया उपप्रमुख जुना बस्नेतं जानकारी बियादीगु दु ।

नगरपालिकां दँय्दसं नमूना विद्यालय दयेकेगु अठोट याःगु जानकारी बियादिसें नगरपालिकाया प्रशासकीय अधिकृत चिरञ्जीवी तिमल्सिनां सामुदायिक विद्यालय जनप्रतिनिधिया नेतृत्वय् जुल धाःसा विद्यालयया शिक्षा नं गुणस्तरीय जुइगु ल्याखं नगरसभां उगु निर्णय याःगु खः धयादिल ।
अथे हे नगरसभाया उगु बैठकं सार्वजनिक शिक्षाय् सुधार, शिक्षकयात तालिमया व्यवस्था यायेगु व दक्वं सामुदायिक विद्यालयया भौतिक संरचनाया सुधार यायेगु नं निर्णय याःगु दु ।

सम्बन्धित बुखँ

LEAVE YOUR COMMENTS