सिक्क्मिय् भाय्, लिपि, संस्कृतिया स्यनामिपिंत हन
थिमि – सिक्किमय् च्वंपिं नेवाःतय्त थःगु भाय्, लिपि, धर्म, कला, संस्कृति, नखःचखः, नसात्वँसा ज्वलं आदिया बारे स्यनेकने याःपिंत छगू ज्याझ्वःया दथुइ हनेज्या याःगु दु । मध्यपुर थिमि नगरपालिका, सिक्किम नेवाः गुथि व संस्कृति संवद्र्धनया निंतिं युवा नेपाल नांया संस्थाया मंकाः ग्वसालय् जूगु ज्याझ्वलय् वंगु निगू दशक न्ह्यवंनिसें सिक्किमय् वनाः अनच्वंपिंत उकथं नेवाःतय् थीथी पक्षया बारे स्यनेकने यायेगु ज्या यानादीपिंत वाङ्मय शताब्दी पुरुष सत्यमोहन जोशीं हनादीगु खः ।
सन् १९९७ या इलंनिसें स्वनिगलं सिक्किमय् वनाः अन हे लां लां तक च्वनाः नेवाः भाय्, लिपि, बाजं, प्याखं, जात्रापर्व, धर्म संस्कृति, नखःचखः तिसावसः आदि बारे स्यनेकने यायेगु ज्या याना वयाच्वंपिं व्यक्ति व संस्थागत रुपं नं हनेज्या याःगु खः । थुकथं सिक्किमय् च्वंपिं नेवाःतय्त भाय्, लिपि, जात्रापर्व, बाजं, प्याखं स्यनेगु ज्या यानादीपिं व्यक्तिगत व संस्थायात यानाः नीन्याम्ह स्वयां अप्वःसित हनेज्या याःगु खः । ज्याझ्वलय् नवासें मूपाहां जोशीं समग्र सिक्किमया विकासय् नेवाःतय्सं म्हितूगु भूमिकायात कयाः च्वछायादीगु खः ।
वय्कलं सिक्किमय् नेवाःतय्गु भाय् व लिपि नापं नेवाः तजिलजिया विकास, संरक्षण, संवद्र्धन व प्रवद्र्धनया नितिं अनया राज्य सरकारं बजेट हे विनियोजन यानाः नेपालभाषा व नेवाः पहिचानयात ल्यंकेया निंतिं गुगु भूमिका म्हितल व धाथें हे च्वछायेबहगू ज्या जूगु धयादिल । ज्याझ्वलय् सिक्किस नेवाः गुथिया नायः दिलु प्रधानं नेवाःतय्सं थःगु भाय्, लिपि, कला, संस्कृति सयेकेगु आपालं अवसर दःसां उकियात चिउताः मतःगु व गम्भिर मजूगु खँय् चिउताः प्वंकादिल । अथे खःसां सिक्किमय् च्वंपिंके नेवाः भाय्, लिपि, कलाः साहित्य, संस्कृतिप्रति धाःसा गाक्कं मतिना दुगु नं वय्कलं धयादिल ।
मध्यपुर थिमि नगरपालिकाया प्रमुख मदनसुन्दर श्रेष्ठं थिमिया हे कायमचा संस्कृतिविद् गणेशराम लाछि सिक्किमय् वनाः थनया संस्कृति, कलाया बारे स्यनेकने यायेगु निंतिं गुगु भूमिका म्हितादिल व धाथेंया हे गौरवया विषय जूगु धयादिल । ज्याझ्वलय् नेपालभाषाया सांगीतिक ख्यःयात तब्या यायेगुलिइ योगदान बिउगु धासें जनगायक रामकृष्ण दुवाल, रामेश, नेपालभाषाया आपालं म्येँय् संगीत तयादीम्ह मनराजा नकःमि व म्येँ हालामि पवित्र कसाःयात सम्मान याःगु खः ।
अथे हे उगु ज्याझ्वलय् नेपाःया लोकसंगीतया बारे थीथी पत्रपत्रिकाय् पिहां वःगु समाचारयात कयाः ब्वँमिपिनिगु मिखाय् उत्कृष्टताया आधारय् छनौट यायेगु नापं अज्याःगु लोकसंगीत सम्बन्धी बुखँ, च्वसु व किपाया नं ब्वज्या याःगु खः । उकथं पत्रिकाय् पिहां वःगु समाचारयात ज्याझ्वलय् वःपिनिपाखें उत्कृष्ट जूगु समाचारयात लिपा हाकनं विशेष मूल्यांकन यानाः याकनं हे छगू ज्याझ्वःया दथुइ हनेगु गणेशराम लाछिं कनादीगु दु ।
LEAVE YOUR COMMENTS