कवितायात कया दुवाला

येँ – नेपालभाषा परिषद्या ग्वसालय् चिनाखँय् दइगु तत्व व उकिया प्रभावकारितायात कयाः छगू अन्तरक्रिया नापं चिनाखँ न्यंकेगु ज्या जुल ।नेपाः वयाच्वंम्ह अमेरिकी कवयित्री विला सेनेबर्गया प्रमखु आतिथ्यताय् जूगु ज्याझ्वलय् कविताया संरचनायात कयाः सहलह जूगु खः । ज्याझ्वलय् कवयित्री सेनेबर्गं कविताया थासा व सम्प्रेषणया खँय् नवासें अनुभूतियात न्ह्यब्वयेगु खँय् कविपिं सचेत जुइमागु खँ कनादिल ।

ज्याझ्वलय् कवयित्री विलाया नापं कविपिं योगेन्द्र प्रधान, वंशी श्रेष्ठ, डा. केशवमान शाक्य, नविन चित्रकार, पुष्परत्न तुलाधर, प्रतिसरा साय्मी, सुदन खुसः, सुलोचना मानन्धर, पुष्पराज राजकर्णिकार, श्रीराम श्रेष्ठ, सुधीर ख्वबि, रजनी मिला, शाक्य सुरेन, भगतदास श्रेष्ठ व नारद वज्राचार्यपिंसं थःथःगु कविता ब्वना न्यंकूगु खः । ज्याझ्वः परिषद्या नायः सुवर्ण शाक्यया सभापतित्वय् जूगु खः ।