विदेशी अनुदान वत्तले जक मांभासं शिक्षा !

येँ – देय्या शिक्षा नीति बांलाकेमाः धकाः सरकारं दँय्दसं शिक्षा ख्यलय् खर्बौं तकाया बजेट फ्यायेगु ज्या याइ । तर मांभासं आखः ब्वंकेगु लागिं धाःसा दांछि दांया हे बजेट निकासा याइ मखु । फिनल्याण्डया आर्थिक ग्वाहालिं छुं ई न्ह्यः देय्या थीथी थासय् मांभासं आखः ब्वंकेगु व्यवस्था याःगु नं खः । तर फिनल्याण्डं ध्यबा बीगु बन्द यायेवं थ्व व्यवस्था नं बन्द याना छ्वत । सरकारं अझ नं देशय् छगू भासं जक शिक्षा बीगुली जक राष्ट्रिय धुकू खर्च यानाच्वंगु व थःगु हे देशय् च्वंपिं जनतां ल्हाइगु अन्य भासं शिक्षा बीगु खँय् धाःसा विदेशं अनुदान वःसा जक कार्यक्रम दयेकेगु व अनुदान मवःसा वास्ता मयायेगु यानाच्वंगु प्रस्ट जूगु दु ।

वि.सं. २०६५ सालय् फिनल्याण्डं बिउगु ध्यबाया भरय् पूर्वी नेपाःया स्वंगू जिल्लाय् थीथी न्हय्गू स्कूलय् अन हे ल्हाइगु स्थानीय मांभासं आखः ब्वंकेगु व्यवस्था याःगु खः । थुकी सुनसरी, झापा व धनकुटाया न्हय्गू स्कूलय् स्थानीय उराँव, मैथिली, थारू, आठपहरिया, राजवंशी व सन्थाल भासं आखः ब्वंकेगु व्यवस्था याःगु खः ।थुकी फिनल्याण्डं बिउगु अधिकांश ध्यबा सफू तयार यायेगुली हे खर्च जुल । स्कूलय् आखः ब्वंकीपिं शिक्षकतय्त बीत ध्यबा मगाः । बल्ल बल्ल मातृभाषा कक्षा सञ्चालन ला यात । तर लिपा फिनल्याण्डं ध्यबा बीगु बन्द यायेवं थ्व आखः ब्वंकेगु ज्या नं बन्द याना बिल ।

अन मांभासं आखः ब्वंकीगु स्कूलय् हानं न्हापा थें हे छगू जक भासं आखः ब्वंकेगु ज्या सुरु याना छ्वत । थ्व मांभासं आखः ब्वंकेगु व्यवस्था सुरु जूबलय् सम्बन्धित समुदायं थः मस्तय्त वहे स्कूलय् छ्वयेगु सुरु याःगु खःसा थुकिं यानाः स्कूल वइपिं मस्तय् ल्याः नं अप्वःगु खः । अन मांभासं आखः ब्वंकेगु व्यवस्था याःगु खःसां स्थानीय अभिभावकतय्सं धाःसा अंग्रेजी विषय बल्लाकेगु ज्या नं याना बी माल धकाः शिक्षकतय्त इनाप याःगु खः । तर स्कूलं थुखेपाखे धाःसा खास ध्यान बी मफुगु खँ धाःगु दु ।

आः देशय् संघीय प्रणाली लागू जुइधुंकाः थीथी प्रदेशय् मांभासं हे आखः ब्वंकेगु व्यवस्था जुइमाः व उकिया लागिं प्रदेश सरकारं पहल यायेमाः धइगु सः थ्वयाच्वंगु दु । स्वनिगः दुने नं थीथी स्कूलय् मांभासं आखः ब्वंकेगु ज्या जुयाच्वंसां थ्व निजी क्षेत्र व स्थानीय निकायया ग्वाहालि कयाः सञ्चालन जुयाच्वंगु खः ।

सम्बन्धित बुखँ

LEAVE YOUR COMMENTS