पद विभाजनं वाम एकता अलमल, वाम सरकार मवइ धकाः राष्ट्रपति समेत चिन्तित

येँ – थौं जुया–च्वंगु राष्ट्रिय सभाया चुनाव लिपा तुरुन्त हे न्हूगु केन्द्रीय सरकार गठनया ज्या शुरु जुइ । तर केन्द्रीय सरकार गठन जुइ न्ह्यः हे एमाले व माओवादी एकता यायेगु धकाः न्ह्यानाच्वंगु तयारी पूवनीगु सम्भावना कम जक जूगुलिं सरकार गठनय् समेत समस्या वइगु खः लाकि धइगु ग्याःचिकु ब्वलंगु दु । एमालें पार्टी एकता जूसां माओवादीयात प्रधानमन्त्री व पार्टी अध्यक्ष निगू छगू पद हे मबीगु खँ ल्हाना हःगुलिं सरकार गठनय् समस्या वये फुगु अनुमान याना हःगु दु ।

नेपाली कांग्रेसया सभापति शेर बहादुर देउवां माओवादी अध्यक्ष पुष्पकमल दाहालयात याकःचां हे सरकार चले यानादिसँ, थःपिंसं न्यादँ तक हे पिने च्वनाः समर्थन याये धकाः न्हापा हे आश्वासन बिया तयेधुंकूगु दु । कांग्रेस व मधेसवादी दलतय्गु समर्थन दत धाःसा दाहालया नेतृत्वय् सरकार गठन जुइ नं फु । अज्याःगु अवस्था जुल धाःसा दाहालया ल्हातय् पार्टी अध्यक्ष व प्रधानमन्त्री निगुलिं पद लानाच्वनी । नापं कांग्रेसलिसे जानाः अज्याःगु समीकरण निर्माण जू वन धाःसा एमालें राष्ट्रपति पद समेत गुमे याये मालीगु अवस्था वयेफु ।

थ्वहे कारणं राष्ट्रपति विद्यादेवी भण्डारीं प्रम वा अध्यक्ष निगू मध्ये छगू पद बियाः जूसां माओवादीयात ल्हातय् कया तये माली धकाः एमाले अध्यक्ष केपी ओलीयात ‘सुझाव’ बियादीगु खँ सूत्रं धाःगु दु । एमाले व माओवादीया सरकार गठन जुल धाःसा थः हे हानं छक्वः राष्ट्रपति जुइगु इच्छा नं भण्डारीं व्यक्त याना वयाच्वनादीगु दु । राष्ट्रपति भण्डारीं भारतीय विदेशमन्त्री सुष्मा स्वराजयात नापलाये धुंकाः ओलीयात थज्याःगु ‘सुझाव’ बियादीगु खः ।

चुनावय् बूपिंत राष्ट्रिय सभाय् हइगु ?

राष्ट्रिय सभाया चुनाव थौं जुइत्यंगु दु । राष्ट्रिय सभाय् मुक्कं यानाः ५९ म्ह दुजः दइगु खःसां २४ म्ह न्हापा हे निर्विरोध रुपय् त्यायेधुंकूगुलिं थौं ३२ म्ह दुजः ल्ययेगु लागिं जक मतदान जुइत्यंगु खः । थौं मतदान क्वचायेवं कन्हय् तकया दुने हे लिच्वः पिहां वयेधुंकीगु खँ धाःगु दु । थ्व धुंकाः ल्यं दुपिं स्वम्ह दुजः धाःसा सरकारं मनोनित याइगु ग्वसाः दु ।

सूत्रतय्सं धाः कथं सरकारं ल्यइपिं स्वम्ह दुजःत प्रधानमन्त्री शेरबहादुर देउवां कांग्रेस नेतात रामचन्द्र पौडेल, विमलेन्द्र निधि व थः हे जहान आरजु देउवायात मनोनित यायेगु तयारी यानादीगु दु । थ्व स्वम्हं हे वंगु चुनावय् पराजित जूपिं कांग्रेस उम्मेदवारत खः । थ्वयां लिपा वय्कलं राजीनामा नं बियादीगु खँ धाःगु दु । राष्ट्रिय सभाया लिच्वः पिहां वयेधुंकल कि तिनि सरकारं प्रतिनिधिसभाया लिच्वः सार्वजनिक याइ । वयां लिपा न्हूगु सरकार गठनया प्रक्रिया शुरु जुइ ।

सम्बन्धित बुखँ

LEAVE YOUR COMMENTS