ताइवानय् शक्तिशाली भुखाय्

एजेन्सी- ताइवानय् शक्तिशाली भुखाय् ब्वःगु दु । स्थानीय ई कथं वंगु चान्हय् ११ः५० ताःइलय् पूर्वी तटपाखें २० किलोमिटर तापाक केन्द्रविन्दु जुयाः ६.४ म्याग्निट्च्युडया भुखाय् ब्वःगु खः ।

भुखाचय् लानाः सीम्ह निम्ह लुइकेधुंकूगु दुसा निसलं मल्याक घाःपाः जूगु दु । उद्धारकर्तातय्सं ख्वालियन शहरय् क्वःदयेत्यंगु होटल व छेँय् नं १५० म्हं मल्याक मनूतय् उद्धार याःगु दु ।
भुखाचं यानाः तःखा हे छेँ क्वःदःगु दुसा गुलिखे छेँय् क्वदयेत्यंगु खनेदु । स्थानीय संचारमाध्यमतय्सं धाःकथं छगू अस्पताल भवन नं बांमलाक क्षति जूगु दु ।

भुखाय् लिपा ४० हजार छेँय् लःया आपूर्ति बन्द जूगु दुसा राजमार्ग व ताँ बन्द जूगु दु । अनया नांजाःगु झितँजाःगु मार्शल होटलया अण्डरग्राउण्ड व न्हापांगु तल्ला क्वचिना वंगु खँ प्रत्यक्षदर्शीतय्सं धाःगु दु । थन होटलय् निम्ह मनूत अझं दुने लानाच्वंगु खँ धाःगु दु । दुने लानाच्वंपिंसं मोबाइलया टर्च च्याकाः संकेत यानाच्वंसां उद्धार यायेत थाकुयाच्वंगु खँ धाःगु दु ।

ताइवानया ख्वालियन शहरय् थ्यंमथ्यं छगू लाख मनूतय् बसोबास दुसा थ्व छगू लोकंह्वाःगु पर्यटकीय थाय् खः ।

सम्बन्धित बुखँ

LEAVE YOUR COMMENTS