जनकवि दुर्गालालयात वय्कःया हे म्येँ देछा

येँ – सीता मां संगीत किपूया ग्वसालय् छगू ज्याझ्वःया दथुइ जनकवि दुर्गालाल श्रेष्ठयात वय्कःया हे म्येँयात सांगीतिक देछाकथं लःल्हायेगु ज्या जुल ।
स्रष्टाया कृति स्रष्टायात हे स–सम्मान लःल्हायेगु ज्याझ्वः कथं जनकवि श्रेष्ठं न्हय्गू दशक न्ह्यवंनिसें रचना यानादीगु उत्कृष्ट म्येँया रचनायात सांगीतिक देछाकथं लःल्हायेगु ज्या जूगु खः । जनकवि श्रेष्ठं खुगू दशक न्ह्यः त्वाःत्वालय् जुइगु साहित्य सम्मेलनया झ्वलय् रचना यानादीगु म्येँय् थःगु सः बियादीम्ह नांजाःम्ह म्येँ हालामिनापं लय्चिनामि योगेश वैद्यया हे सलय् दुथ्याकाः पिथनादीगु म्येँ वय्कःयात हे लःल्हाःगु खः ।

ज्याझ्वःया मूपाहां नांजाःम्ह म्येँ हालामि प्रेमध्वज प्रधानं स्रष्टाप्रति सम्मानकथं दोसल्लां न्ययेकाः सम्मान यानादीगु खःसा नेपाल संगीत तथा नाट्य प्रज्ञा प्रतिष्ठानया उपकुलपति शम्भूजीत बाँस्कोटों हनापौ लःल्हानादीगु खः । उगु ज्याझ्वलय् म्येँ हालामि वैद्य व प्रतिभावान म्येँ हालामि रीता महर्जनया सः दुथ्याःगु ‘फर्गटन मेलोडिज्’ व ‘रीता एट हर बेस्ट’ नांया निचाः सिडी म्येँ हालामि वैद्यया ल्हातं पाहांपिंत लःल्हायेगु ज्या जूगु खः ।