सांसदत‍य‍्त हेटौंडा मयल , राजधानी मेथाय् यंकेत चर्चा शुरु

येँ – प्रदेश नम्बर ३ या आपालं धइथें प्रदेश सांसदतय्सं प्रदेशया राजधानी मकवानपुरया हेटौंडाय् तःगु पायक मजुल धकाः आलोचना याना हःगु दु । ‘नेपालभाषा टाइम्स’ लिसें खँ ल्हासें वय्कःपिंसं प्रदेशया बहुमत सांसदत प्रदेशया राजधानी पायक मजूगुलिं मेथाय् तयेमाःगु पक्षय् दुगु खँ कनादीगु दु ।
हेटौंडाय् प्रदेशया राजधानी तःगु पाय‍्िछ  मजुल धकाः आपाःस्यां धाःसां आः थथें धाःसा खुले जुयाः न्ववायेत वय्कःपिं तयार मजूनि । वय्कःपिंसं धयादीगु दु, ‘यदि चुनाव जुइगु अवस्था वल धाःसा राजधानी सरे यायेमाः धइगु पक्षय् जिमिसं मत बीगु जुइ ।’

सीदु कथं विशेष यानाः सिन्धुपाल्चोक, रामेछाप, दोलखा, सिन्धुली जिल्लाया सांसदतय्सं थःपिं हेटौंडाय् वनेगु निंतिं छन्हु येँ वयाः च्वनेमाःगु व येँनं हाकनं हेटौडा वनेमाःगुलिं तसकं थाकुगु खँ कनेगु यानाच्वंगु दु ।छखे ताःहाकःगु यात्रा यायेमाःसा मेखे हेटौडाय् माक्व सुविधा नं मदुगु खँ नं सांसदतय‍्स‌‌‍ धाःगु दु । स्वनिगः जःखः हे प्रदेशया राजधानी जुल धाःसा फुकसितं अःपुइगु खँ नं वय्कःपिंसं कनादी । झिंस्वंगुलिं जिल्लाया केन्द्रविन्दुइ प्रदेशया राजधानी तयेमाःगु व थथे जुल धाःसा जक न्ह्याग्गु थासं वइपिं सांसदया निंतिं नं उपयुक्त जुइगु वय्कःपिनि धापू दु ।

स्थायी राजधानी मेथाय् सारे याइगु खँय् ढुक्क जुयाः हे सपथ ग्रहण लिसें प्रदेशसभाया न्हापांगु बैठकय् तकं सभासदपिं थःपिनिगु ज्याझ्वः सिधयेवं हथासं लिहां वयेगु यानाच्वंगु दु । सुं नं सांसद हेटौंडाय् तुं च्वनेगु यानाच्वंगु मदु । प्रदेशसभाया नियमित बैठक न्ह्यात धाःसा लछि स्वयां नं अप्वः अन च्वने मालीगु अवस्था दुसां नं सांसदतय्सं आः तक अन च्वनेगु मनस्थिति दयेकाच्वंगु मदुनि । ‘राजधानी हे ठेगाना मदुनि, क्वथा बालं कयां छु याये ?’ येँयाम्ह छम्ह सांसदं कनादिल । अथे हे मेपिं छुं सांसदतय्सं प्रदेशसभा च्वनेगु बैठक भवन तकं उपयुक्त मजूगु खँ नं धयाहःगु दु । उमिगु धापू कथं संसद बैठक च्वनेगु थाय् संसद स्वयां नं मिटिङ यायेगु क्वथा जक थें च्वं ।

राजधानी सारे याःसा आन्दोलन

मकवानपुरया हे स्थानीय सांसदत धाःसा प्रदेशया स्थायी राजधानी समेत आः हेटौंडाय् हे जुइमाःगु खँय् अडिग जुयाच्वंगु दु । उमिसं आः राजधानी मेथाय् यंकल धाःसा आन्दोलन यायेगु ख्याच्वः समेत बियाहःगु दु । माओवादीया स्थानीय सांसदतय्सं ला यदि राजधानी सारे यायेगु धकाः पार्टीपाखें ह्वीप वल धाःसा उकियात स्वीकार मयायेगु खँ तकं धयाहःगु दु । उमिसं वीरगञ्ज भन्सार लिकसं लाःगु व हेटौंडां स्वनिगः वयेगु लँपु नं ताहाकः मजूगुलिं हेटौडाय् हे प्रदेशया स्थायी राजधानी तयेमाः धयाच्वंगु दु ।

सम्बन्धित बुखँ

LEAVE YOUR COMMENTS