सिरियाय् रुसी विमान कुर्कल

छगू सिरियाली विद्रोही पुचलं इडलिब शहर लिक्कसं छगः रुसी लडाकु विमान कुर्का बिउगु दु । ताहिर अल शाम नामंया जिहादीतय् गठबन्धनं ‘सुखोइ २५’ नांया लडाकु विमानयात कुर्कूगु खः । उमिसं ब्वहलय् तयाः कयेकीगु क्षेप्यास्त्र कयेकाः विमान कुर्कूगु खः ।रुसी विदेश मन्त्रालयं विमानं पिहां वयाः बिसिउँ वनेत स्वःम्ह पाइलटयात विद्रोहीतय्सं स्यानाबिउगु खँ नं धाःगु दु । थ्व विमान सिरियाली सरकारया फौजयात ग्वाहालि याना वयाच्वंगु विमान खः । रुसं अलेप्पों दक्षिणय् लाःगु सतक सिथसिथय् निशाना दयेकाः बम कुर्का वयाच्वंगु दु ।

थ्व विमान कुर्केधुंकाः रुसं याःगु जवाफी आक्रमणय् स्वीम्हं मल्याक विद्रोही सीगु खँ मस्कों धाःगु दु । सिरिया युद्धयात निगरानी तयावयाच्वंगु पुचलं रुसी विमानतय्सं वंगु २४ घण्टाया दुने दर्जनौं थासय् आक्रमण याःगु खँ धाःगु दु । सामाजिक सञ्जालय् तयातःगु भिडियोय् क्षेप्यास्त्र लायेवं विमानय् तुरुन्त हे मि च्याःगु व फनफन चाःहिलाः कुतुं वःगु खनेदुगु खः । रुसया थ्व विमान कुतुंवंगुयात थौंकन्हय्या इलय् तसकं दुर्लघ घटना कथं कयातःगु दु । रुसी विदेश मन्त्रालयं विमान चालकया सीम्ह मालेगु निंतिं सम्भव दक्व फुक्क उपाय नालाच्वनागु खँ धाःगु दु ।सन् २०१५ या सेप्टेम्बरनिसें सिरियाय् रुसं कारवाही यायेधुंकाः न्हापांखुसी थथे लडाकु विमान कुर्कूगु खः ।

सम्बन्धित बुखँ

LEAVE YOUR COMMENTS