ने. सं. ११४४ चौलाथ्व दशमी -

प्रदेशया पोशाक बारे चर्चा

येँ – प्रदेशसभाया बैठक च्वनेगु क्रम शुरु जूगुयालिसें आः प्रदेशसभा सदस्यतय् पोशाक गज्याःगु जुइ धइगु बारे नं चर्चा शुरु जूगु दु । खतुं आतक प्रदेशसभा सदस्यया पोशाकया बारे छुं औपचारिक निर्णय धाःसा जूगु मदुनि । थ्व झ्वलय् न्हय्गू प्रदेशमध्ये दकलय् न्हापां प्रदेशसभाया बैठक च्वंगु ३ नं. प्रदेशया सांसदतय् पोशाक गज्याःगु जुइ धइगु बारे चर्चा शुरु जूगु दु । न्हय्गू प्रदेश मध्ये दकलय् न्हापां प्रदेश नं. ३ या बैठक च्वंगु खः । प्रदेश नं. ३ या न्हापांगु प्रदेशसभा बैठकं प्रदेशसभा संचालन सम्बन्धी अन्तरिम कार्यविधि–२०७४ पारित याःगु दुसा व हे कार्यविधिइ प्रदेशसभा सदस्यतय् पोशाक गज्याःगु जुइ धइगु बारे सभामुखं क्वःछिउकथं जुइगु व्यवस्था याःगु दु ।

सामान्यतयाः नेपाःया संसदीय परम्पराय् मिजंतय्सं तपाःलं सुरुवाः व खरानी रंग कोट व मिसातय्सं मिसा लं व पर्सि नापं खरानी रंगया हे कोट पनेगु चलन दु । तर सम्बन्धित प्रदेशया सन्दर्भय् धाःसा थःत यःगु वा मेगु छुं विशेषकथं वसः पुनेगु धइगु बारे सभामुखं क्वःछी फइगु कार्यविधिइ दु ।
प्रदेश नं. ३या उगु न्हापांगु बैठकं छगू कार्यदल तकं गठन यानाः स्थायी कार्यविधि दयेकेगु ज्या मजूतलेया निंतिं दलीय सहमतिया लिधंसाय् अन्तरिम कार्यविधि सर्वसम्मतं पारित याःगु खः । अन्तरिम कार्यविधिइ प्रदेशसभा सदस्यतय् पोशाक सभामुखं क्वःछीगु नापं बैठक संचालन, अध्यक्षता, बैठकया मर्यादा, शिष्टाचार, प्रस्ताव न्ह्यब्वयेगु व पारित यायेगु विधि, अनुशासन लगायतया खँ दुथ्याकातःगु दु ।