विश्वकप २०१८

अरनिको समाजपाखें चिनिया न्हूदँया लसकुस

येँ- अरनिको समाजया ग्वसालय् याकनं वयेत्यंगु चिनिया न्हूदँ (खिचा दँ)यात लसकुस यायेत वसन्त उत्सव हंगु दु । ज्याझ्वलय् समाजया अध्यक्ष डा. सर्वोत्तम श्रेष्ठं अरनिको समाजं याना वयाच्वंगु ज्याया बारे न्ववानादिसें थुगु दँय् जक नेपाःया थीथी थासय् यानाः समाजं न्हय्गू स्वास्थ्य शिविर यानागु जानकारी बियादीगु खः । अथेहे वय्कलं समाजलिसे आवद्ध जूवंपिं चीनय् ब्वनावःपिं थीथी व्यक्तिपिंत ‘फ्रेन्डस् अफ अरनिको सोसाइटी’या दसिपौ लःल्हानादीगु खः ।

ज्याझ्वः संचालन यानादिसें समाजया वरिष्ठ उपाध्यक्ष डा. मनोज श्रेष्ठं चीनय् ब्वनेगु निंतिं समाजपाखें थीथी छात्रवृत्ति बिया वयाच्वनागु खँ न्ह्यथँसें थुगुसी जक ५० म्हं मल्याक विद्यार्थीपिंत कृषिनिसें थीथी विधाय् ब्वनेगु निंतिं छात्रवृत्ति बियागु जानकारी बियादीगु खः । लिसें वय्कलं चीनय् ब्वंवने इच्छुकपिं जेहेन्दार विद्यार्थीपिं दुसा समाजय् स्वापू तयेत नं इनाप यानादीगु खः ।

ज्याझ्वलय् न्ववानादिसें नेपाःस्थिति चिनिया राजदूतावासया संस्कृति विभाग प्रमुख त्र पाइ जुं वंगु दँ सन् २०१७ य् नेपाः व चीन दथुइया स्वापुतिइ न्हूगु आयाम थप जूगु खँ धयादीगु खः ।

विशेष कारणं चिनिया राजदूत यु हाङ उपस्थित जुइमफयेवं वय्कःया पाखें सुभाय् न्वचु बियादिसें चीन नेपाःया न्ह्याब्लें असल मित्र जुयाच्वंगु धासें थुगु दँय् नं राजनीतिक, आर्थिक, साँस्कृतिक, व्यावसायिक क्षेत्रय् थीथी ग्वाहालि जूगु खँ धयादीगु खः ।

सन् २०१७ चीनया निंतिं नं महत्वपूर्ण जूगु खँ धयादिसें वय्कलं थ्व दँय् चीन चिनिया विशेषतायुक्त समाजवादया न्हूगु युगय् प्रवेश जूगु खँ धयादीगु खः । थ्वहे दँय् चीनया आर्थिक उन्नतिं अन्तर्राष्टिय रंगमञ्चय् चीनं विशेष थाय् काःगु खँ न्ह्यथनादीगु खः ।

ज्याझ्वलय् चीनं एशिया निसें अफ्रिका तक स्वायेगु निंतिं दयेकाच्वंग रेश्म मार्ग (छगू प्रदेश छगू मार्ग)या वृत्तचित्रया छगू ब्व नं प्रदर्शन याःगु खः ।

सम्बन्धित बुखँ

LEAVE YOUR COMMENTS