ने. सं. ११४४ चौलाथ्व दशमी -

अमेरिका विरुद्ध क्यानाडाय उजुरी

क्यानाडां अमेरिकाया व्यापारि नीतिया विरुद्ध तच्वःगु सः थ्वयेकूगु दु । विश्व व्यापार संगठनय् क्यानाडां अमेरिकाविरुद्ध व्यापक उजुरी दर्ता याःगु दु ।
समाचार एजेन्सी रोयटर्सया कथं निगू देय् दथुया थ्व विवाद लिपा अमेरिकां क्यानाडां थथे उजुरी यानाः थःत हे नोक्सान यानाच्वंगु खँ धाःगु दु । लिसें अमेरिकां क्यानाडा चीनया ल्हातय् प्याखं हुलाच्वंगु द्वपं नं बिउगु दु ।
क्यानाडां अमेरिकां नाला वयाच्वंगु एन्टी डंपिंग व एन्टी सब्सिडी ड्यूटी विरुद्ध उजुरी बिउगु खः । अमेरिकां यानाच्वंगु ज्याया निसःगू उदाहरण बिसें क्यानाडां धाःगु दु, ‘अमेरिकां चीन, भारत, ब्राजिल व युरोपेली संघ लिसें फुक्कं सम्बन्धित व्यापार साझेदारतलिसे गलत व्यवहार यानाच्वंगु दु ।’
क्यानाडाया थ्व उजुरी लिपा विश्व व्यापार संगठनय् अमेरिकी प्रतिनिधि रोबर्ट लाइटजरं धाःगु दु, ‘विश्व व्यापार सगठनय् वःगु क्यानाडा उजुरी अमेरिकी व्यापार प्रणालीयात कयाः म्वायेकं म्वायकं वाःगु बेकारया आक्रमण खः । क्यानाडाया थ्व उजुरीं छुं हिउपाः हे वःसां उकिया प्रारम्भिक लबः मेमेगु देय्यात जुइ, क्यानाडायात दइमखु । उकिं क्यानाडाया उजुरी वयागु निंतिं हे ठीक जुइमखु ।’
क्यानाडां अमेरिकी व्यापार नियमय् दुगु प्राविधिक गडबडीयात कयाः ३२ पानाया उजुरी दर्ता याःगु खः । थुकी अमेरिकी अन्तर्राष्ट्रिय व्यापार आयोगं नं निर्यात नियन्त्रणय् विभाजनकारी नीति दयेकातःगु खँ न्ह्यथनातःगु दु ।
क्यानाडाया विदेशमन्त्री क्रिस्टिया फ्रील्यान्डं धाःगु दु, ‘अमेरिकां थःथाय् नोकरी बचे यायेगु निंतिं क्यानाडाया उत्पादनय् कर कयाच्वंगु दु ।’
क्यानाडाया कथं अमेरिकी उत्पादक डब्ल्यूटीओया एन्टी डंपिंग सम्झौतायात उल्लंघन यानाच्वंगु दु । थुकिया लिसें सब्सिडी व मूल्य निर्धारणया नियम नं उल्लंघन यानाच्वंगु द्वपं बिउगु दु ।
अमेरिकी राष्ट्रपति डोनाल्ड ट्रम्पं अन्तर्राष्ट्रिय व्यापारय् ‘अमेरिकी फस्र्ट’ नीति नालाच्वंगु दु । थुकिया कारणं ट्रम्पं गुलिखे बहुसदस्यीय व्यापार सम्झौतायात रद्द यायेधुंकूगु दु ।
विश्व व्यापार संगठनया नियम कथं अमेरिकायात थ्व उजुरी समाधान यायेगु निंतिं ६० न्हुया ई दइ, थ्व लिपा संगठनं थुकी थःगु फैसला न्यंकी ।