जापानय् नेवाः नसा नखः क्वचाल, नेवाः सुपरस्टार पुरस्कार घोषणा

येँ – वल्र्ड नेवाः अर्गनाइजेसन (डब्लुएनओ), जापानया ग्वसालय् जूगु नेवाः नसा नखः–२०१८ तःजिक क्वचाःगु दु । देशं पिने न्हापांखुसी जूगु ज्याझ्वः विशेष यानाः जापानीतय् दथुइ नेवाः नसा व संस्कृतिया प्रचार प्रसार यायेगु ल्याखं जूगु खः । ज्याझ्वलय् जापानय् च्वनाच्वंपिं नेवाःत नापं उल्लेख्य रुपं जापानीतय्सं ब्वति काःगु ग्वसाः खलः डब्लुएनओ जापानं न्ह्यथंगु दु ।संस्थापाखें ग्वसाः ग्वःगु न्हापांगु नेवाः नसा नखः–२०१८ य् तःताजिकथंया नेवाः नसा ज्वलं नापं नेवाः संस्कृति पिब्वयेकथं तिसावसः, कुमारि, लाखे, चचा प्याखंलिसें थीथी नेवाः हुलाप्याखं व म्येँ न्ह्यब्वःगु खः ।

उगु ज्याझ्वलं ज्याझ्वः जूगु थाय् राजधानी टोकियोय् च्वंगु इकेगामि काईकान हल छगुलिं नेपाःमय जूगु ग्वसाः खलकं धाःगु दु ।डब्लुएनओ जापानया संयोजक सुनिलकुमार शाक्यया सभापतित्वय् जूगु ज्याझ्वलय् मूपाहांकथं जापानया निंतिं नेपाःया राजदूत प्रतिभा राणा झायादीगु खः । अथे हे विशेष पाहाकथं नेपाःया निंतिं पुलांम्ह जापानी राजदूत मासायुकी कोजिमा, जापान नेपाल संघया उपाध्यक्ष योशिनागा हिदेआकी, प्रा.डा. केशवलाल महर्जन, एनआरएन जापानया उपाध्यक्ष देवीलाल भण्डारी, हाजिमेज्युकु स्कुलया मासाहिरो वादा, नेपालं झायादीम्ह नेवाः जागरण मंचया अध्यक्ष सुजीव वज्राचार्यलिसें थीथी संघसंस्थाया प्रतिनिधिपिनिगु उपस्थिति दुगु खः ।

नेपाल संवत् ११३८ न्हूदँया लसताय् नेवाः नसाज्वलं जापानीतय् दथुइ प्रचार प्रसार व प्रवद्र्धन यायेगु उद्देश्यं उगु ज्याझ्वः यानागु ग्वसाः खलकं जानकारी बिउगु दु । ज्याझ्वः तसकं न्ह्यइपुसे च्वंगु व जापानीतय् दथुइ नेवाः नसा व संस्कृतिया छाप बांलाक त्वःतेत सफल जूगु ग्वसाः खलःया मासाहिरो यामाकावा ‘ब्यांचा दाई’ नं कनादीगु दु । नेपालं पिने न्हापांखुसी जूगु धयातःगु ज्याझ्वलय् नेवाःलिसें जापानी कलाकारतय्सं नेवाः म्येँ व हुलाप्याखं न्ह्यब्वयेगु नापं थीथी नेवाः बाजंया प्रस्तुति नं बिउगु खः । ज्याझ्वलय् नेवाः नाप जापानीतय्सं नेवाः वसतय् ब्वति काःगु खः ।थ्व हे झ्वलय् उगु ज्याझ्वःया दथुइ ‘नेवाः सुपरस्टार पुरस्कार’या नं घोषणा याःगु दु ।

नेपालभाषाया संकिपा ख्यःया कलाकारतय्त प्रोत्साहन कथं बीगु छगू लाख तका दांया उगु सिरपाः दँय्दसं छम्हेसित नेवाः सुपरस्टार घोषणा यानाः उगु सिरपाः बीगु जूगु दु । नेपालभाषा, कला, संस्कृतिया उत्थान यायेगु ल्याखं दँय्दसं न्हूदँ कुन्हु बीगु पुरस्कारया निंति आर्थिक ग्वाहालि अभियान अन्तर्गत संचालन याइगु अभियानयात सफल यायेत व ग्वाहालि यायेत विश्वन्यंकंया नेपाःमिपिंत संस्थाया संयोजक शाक्यं इनाप यानादीगु दु ।
नेपाली राजदूतावास टोकियो, नेपाल पर्यटन बोर्ड नेपाः, एनआरएन जापान, नेवाः जागरण मंच जापान, नेवाः गुथि जापान व नेवाः अन्तर्राष्ट्रि फोरम जापानया सहकार्यय् जूगु खः ।

सम्बन्धित बुखँ

LEAVE YOUR COMMENTS