चुकन्दरय् दुगु वासःया गुण

चुकन्दर अलः रंगयागु छताजि फल खः । तःता हे गुण दुगु थ्व चुकन्दर अप्वःथें मनूतय्सं नये मययेकू । तर थुकिया रस त्वनेगु यात धाःसा हिइ हेमोग्लोबिनया मात्रा अप्वयावइ । चुकन्दरय् यक्व मात्राय् भिटामिन व मिनरल्स दइ, गुकिं हि सफा यायेगु ज्या याइ । थुकी दइगु एन्टिअक्सिडेन्ट तत्वं ल्वय्लिसे ल्वायेगु क्षमता दयेकाबी ।

थ्व प्राकृतिक चिनिया स्रोत खः । थुकी आयरन, सोडियम, पोटासियम, फस्फोरस व मेमेगु महत्वपूर्ण भिटामिन नं दइ । चुकन्दर दुनें ठन्डि याइगु चीज खः । चुकन्दर नयेगु यातकि साहा साहा स्याःगु लनावनी । लीभरयात बल्लाकी । न्ह्यपुया निंतिं नं बांलाः । चुकन्दरयात तरकारि दयेकाः अथवा थुकियात कचिकं नं नयेफु, रस पिकयाः नं त्वनेफु ।

चुकन्दर यक्व कथं हे नयेगु याः । अप्वः थें थ्व सलादया रुपय् नयेगु याइ । अथे जुयाः लैं, गाजर, प्याज, गोलभ्यारा आदि थें हे चुकन्दरयात सलादय् दुथ्याकादिसँ । गनं गनं थासय् थ्व मनाः नयेगु चलन नं दु । अथे मनाः नयेबलय् थुकिया पोषकतत्व पाः जुइगुलिं कचिकं नयेगु हे बेस जुइ । दक्वं पोषकतत्व दुगु ह्याउँसे च्वंगु रस प्राप्त यायेत ताजागु चुकन्दर हे छ्यलादिसँ ।

बुकाः नयेगु खःसां नं ख्वला तुलामकासे व न्हिप्यं नं मध्यंसे उकिया प्राकृतिक अवस्थाय् हे बुकेगु यानादिसँ । अथे जुल धाःसा उकिया पोषकतत्व छतिं हे पाः जुइमखु । छगू अध्ययनं सिइदु कथं चुकन्दरयात माक्व स्वयां अप्वः बुकल कि थुकी दुगु क्यान्सरलिसे ल्वायेगु शक्ति मदयावनी । उकिं थ्व बुकेबलय् चिच्वःगु मिइ देछुनाः हे बुकेगु यायेमाः ।

चुकन्दरया फाइदा
# चुकन्दर फोलेटया बांलाःगु स्रोत खः । अथे जूगुलिं हाइ ब्लड प्रेसरया ल्वगियात चुकन्दर व गाजरया रस छगू छगू कप, मेवा व सन्तरासिया रस बागू बागू कप ल्वाकछ्यानाः न्हिछिया दुने निक्वः यानाः त्वंकाबिल धाःसा फाइदा जुइ ।

# चुकन्दरया रस त्वन धाःसा त्यानुगु लनाः म्हय् फूर्ति थहां वइ ।

# एनीमिया (हि मगाइगु ल्वय्) जुल धाःसा सुथय् बहनी न्हिं छगू कप चुकन्दरया रस सेवन यात धाःसा यक्व हे फाइदा जुइ ।

# चुकन्दरया रस अथवा चुकन्दरयात लखय् दायेकाः उकिया सूप त्वन धाःसा पथरी पिहां वनी । थुकिया ३० ग्रामया मात्राय् न्हिं प्यक्वः छुं वा तक कयादिसँ । थुकिं लीभर मना वयाच्वंगु नं क्वलाकी ।

# चुकन्दरय् मिनरल सिलिका दइ, गुकिं क्याल्सियमया पूर्ति याइ । क्याल्सियम झीगु म्हयात मदयेक मगाःगु तत्व खः । क्याल्सियमं क्वँय् व वा बल्लाकी । म्हय् क्याल्सियम मगाः मजुइकेत चुकन्दरया जूस त्वनादिसँ । मस्तय्सं व ल्याय्म्ह ल्यासेतय्सं चुकन्दर काउँकाउँ न्ह्ययाः नयेमाः, थुकिं यानाः वा व गिजा बल्लानावइ ।

# चुकन्दरं कफ नायेकाः पिकयाहइगु जुयाः श्वासनलि सफा जुयाच्वनी ।

# चुकन्दरया हःयागु रसय् कस्ति ल्वाकछ्यानाः पानाबिल धाःस दाद वःगु व चासुगु लनावनी ।

# चुकन्दर नलकि साहा साहा स्याःगु लनावनी ।

# हाइपोग्लाइसीमिया (हिइ सुगर मगाइगु) चुकन्दर नलकि मजुयावनी । चुकन्दर प्राकतिक सुगरया बांलाःगु स्रोत खः । थुकी सोडियम, पोटासियम, फस्फोरस, क्याल्सियम, सल्फर, क्लोरिन, आयोडिन, आयरन, भिटामिन बी १, बी २ व सी दु । थुकी क्यालोरी तसकं कम जक दइ ।

# निगू चम्चा चुकन्दरया रसय् छगू चम्चा कस्ति ल्वाकछ्यानाः न्हिं न्हिं त्वनेगु यानाच्वन धाःसा प्वाथय् ग्यास थहां वइगु समस्यां मुक्त जुइ ।

# चुकन्दरय् यक्व फाइबर दइगु जुयाः प्वाःलिसे सम्बन्धित समस्या ज्यनावनी । थ्व न्हिं न्हिं नल धाःसा प्वाः सफा जुयाच्वनी, टक्सिन दक्व पिहां वनी ।

# प्वाःया थीथी ल्वय् लंकेत चुकन्दरया गुण तसकं ज्या वःगु साबित जुइ । निगू चम्चा चुकन्दरया रसय् छगू चम्चा कागतिया रस ल्वाकछ्यानाः न्हियान्हिथं त्वनादिसँ । थुकिं बान्ता जूगु, छ्वाल्लुक झारा जूगु, आउँ, लीभर इन्फेक्सन आदि ल्वय्यात फाइदा याइ ।

# मिसातय्गु निंतिं चुकन्दर गुगुं बरदान स्वयां कम मजू । चुकन्दरय् फोलिक एसिड दइ, गुकिं प्वाथय् दुपिं मिसातय्त व प्वाथय् च्वंम्ह मचायात फाइदा याइ । चुकन्दरं मचा बुइगु ब्यथा जुइबलय् ऊर्जा नं बी ।

# थीमज्यू जुइबलय् प्वाः स्याइगु व थीमज्यू इलय् इलय् मजुइगु जुयाच्वन धाःसा चुकन्दर न्हिं न्हिं नयाबीगु यायेमाः, फाइदा जुइ । चुकन्दरं हि अप्वः दयेकाबी । थुकिया रसं मचाया मांयाके दुरु खानावइ, गुकिं यानाः वं थः मचायात गाक्क दुरु त्वंकेफइ ।

# महिनावारी, भुयु कुहां वइगु व च्व फायेगु अंगय् जुइगु थीथी ल्वचय् गाजरया रस व चुकन्दरया रस ल्वाकछ्यानाः न्हिं निक्वः त्वंकादिसँ । थुकिं यानाः मिसातय्गु उगु ल्वय् लनावनी ।

# पुलांगु घाः व हां न्याःथाय् चुकन्दरया रस पानादिसँ, फाइदा जुइ ।

# चुकन्दरया हः निनाः मर्के जूगु थासय् पानाः पट्टि चिनाबिल धाःसा मर्के जूगु जियावनी ।

# कासामित व ब्वाँय् वनीपिंत अक्सर चुकन्दरया रस त्वनेगु सल्हा बीगु याइ । छाय्कि थुकिं मांसपेशीयात अक्सिजनया छ्यलाबुला प्रभावकारी ढंगं यायेगु क्षमता अप्वयेका बी । लिसें म्हयात सह यायेगु शक्ति नं अप्वयेकाबी ।

# म्हासु ल्वय् जूपिंत नं चुकन्दरं फाइदा याः । म्हासु ल्वय्या ल्वगियात चुकन्दरया रस छगू छगू कप न्हिं प्यक्वः बियादिसँ ।

# छगू अध्ययनं सिइदु कथं चुकन्दरय् दुगु पोटासियमं म्हयात न्हियान्हिथंया पोषण बीत ग्वाहालि याइसा थुकी दुगु क्लोरिनं लीभर व किड्नी सफा यायेत ग्वाहालि यानाच्वंगु दइ ।

# चुकन्दरं सनबर्न अर्थात छाःगु निभालं यानाः क्वःगु छ्यंगूयात फाइदा याइ । चुकन्दरया रसय् कपाय् थुनाः निभालं क्वःगु भागय् पानादिसँ ।

# छ्यनय् तुँचा दाल धाःसा चुकन्दरया रसय् भेनेगर ल्वाकछ्यानाः छ्यनय् पानादिसँ, छुं न्हि लिपा हे तुँचा मदयावनी ।

# नेचुरल पिंक लुक (गुलाफि छ्यंगू) दयेकेगु खःसा चुकन्दर तानाः ल्हातं तीजक ज्वनाः ख्वालय् बुलादिसँ ।

# न्हिं छगू गिलास चुकन्दरया रस त्वनेगु वा १५० ग्राम चुकन्दर नयेगु यानाच्वन धाःसा लुसि त्वःधुलीगु, ब्वलावइगु, रंग वनीगु व ख्वातुइगु मजुयावनी ।

# ख्वालय् स्यःकै, पलः वा हाकुक चातः वयाच्वंगु दुसा चुकन्दर व गोलभ्याराया रस बागू बागू कप व छगू गिलास गाजरया रस ल्वाकछ्यानाः त्वन धाःसा थ्व दक्वं कथंया छ्यंगूया ल्वय् मजुयावनी ।

# चुकन्दर व गोलभ्याराया रस छगू छगू कपय् निगू चम्चा हलूपालुया रस अथवा छगू चम्चा हलूचुं ल्वाकछ्यानाः सुथय् बहनी झिंन्यान्हु तक त्वनाबिल धाःसा छ्यंगूया रंग तुइसे च्वंक यचुयावइ ।

सावधानी
१) चुकन्दरया जूस सदां छुं मेगु तरकारि वा फल गथेकि गाजर, स्याउ, अनार आदिया जूसलिसे ल्वाकछ्यानाः त्वनेमाः । चुकन्दरया जूस स्वकं त्वन धाःसा भोकल कर्डय् क्षणिक समस्या वयेफु ।

२) चुकन्दरया जूस बहनी त्वने मजिउ । जूस त्वनेगु खःसा न्हिनय् हे त्वनेमाः ।
जूस दयेकेगु विधि
# दकलय् न्हापां चुकन्दरयात यचुगु लखं सफा यानादिसँ । वयां लिपा लैं चुलेगुलिइ चुलाः चुकन्दरयात तिस्सिनाः जूस पिकयादिसँ । अथे मखुसा चुकन्दरयात चिचिकुक तानाः जूसर मिक्सरय् निनादिसँ, अले छालनीइ तयाः छानय् यानादिसँ ।

# थुकी बागू चम्चा कागतिया रस वा पालुया रस संकादिसँ ।

# थुकथं हे मेमेगु तरकारि वा फलया जूस पिकयाः थुकी ल्वाकछ्यानाः त्वनादिसँ ।

एजेन्सीया ग्वाहालिं निरा महर्जन

सम्बन्धित बुखँ

LEAVE YOUR COMMENTS