०२२ सालया आन्दोलनकारीतय्त हना

यल- थौं स्वयां न्यय्निदँ न्ह्यः रेडियो नेपालं नेपालभाषा समाचार लिकाःगु विरुद्धय् ब्वलंगु भाषा आन्दोलन विषयय् म्हिगः नेपालभाषा मंकाः खलः यलया ग्वसालय् खलःया दबू छेँय् छगू लुमन्ति मुँज्या जुल । ज्याझ्वलय् उगु इलय् आन्दोलनय् सहभागी थीथी ब्यक्तित्वपिंत हनेज्या नं याःगु खः । ज्याझ्वलय् गोष्ठीया मू ज्यापौ डा. पुष्पराज राजकर्णिकार व बिष्णु चित्रकारं मंकाः कथं न्ह्यब्वयादीगु खः ।

२०२२ साल बैशाख १ गते रेडियो नेपालं नेपालभाषां बियाच्वंगु ५ मिनेटया समाचार बन्द यानाबीवं अबलय्या पंचायती दमन विरुद्ध भाषिक कार्यकर्तात वाःवाः पतिकं स्वनिगःया स्वंगुलिं जिल्ला व गां गामय् साहित्य गोष्ठी मार्फत् भाषा प्रचार व साहित्य प्रचारय् लगे जूगु खः । उगु संघर्ष ज्याझ्वःयात लुमंकादिसें नेपालभाषा मंकाः खलः यलया संस्थापक अध्यक्ष छत्रबहादुर कायस्थं थःगु जागिर तकं पर्वाह मयासें जुयागु खँ कनादिल ।

नेपालभाषा मंकाः खलः यलया नायः ऋषिप्रसाद श्रेष्ठया सभापतित्वय् जूगु ज्याझ्वलय् अबलय् साहित्य ब्वनादीपिं डा. पुष्पराज राजकर्णिकार, शान्तदास मानन्धर, बिष्णु चित्रकार, नातिबज्र बज्राचार्य, दुर्गालाल श्रेष्ठ, मुक्ति साय्मि, गणेश साय्मि, छत्रबहादुर कायस्थ, जुलुमलाल चित्रकार, भगतदास श्रेष्ठ, मंगलमान शाक्य, हरिदास श्रेष्ठ, सुवर्णमान श्रेष्ठ व आशबहादुर श्रेष्ठपिंत हनेज्या याःगु खः । शताब्दी पुरुष सत्यमोहन जोशीं उलेज्या यानादीगु उगु गोष्ठी नेवाः देय् दबूया संरक्षक मल्ल के. सुन्दरं नं न्ववानादीगु खःसा प्रा. प्रेमशान्ति तुलाधरं अन न्ह्यब्वःगु ज्यापौयात कयाः टिप्पणी यानादीगु खः ।

सम्बन्धित बुखँ

LEAVE YOUR COMMENTS