तरकारीयात मोहनि लगे जुल

येँ -मोहनि नखः न्ह्यःने वयेवं बजारय् तरकारीया भाः थहां वंगु दु । कालिमाटी तरकारी बजारय् म्हो जक भाः थहां वंगु खःसां खुद्रा व्यापारीतय्सं धाःसा निदुगं अप्वः कयाः तरकारी मियाच्वंगु लूगु दु । कालिमाटी तरकारी बजारय् ह्याउँगु आलु प्रतिकेजी ५५ तका जक तूगु खःसां खुद्रा व्यापारीं ७५ निसें ९० तका तक कयाः मियाच्वंगु दु । अथेहे तरकारी बजारय् चिग्वःगु गोलभेडा प्रति किलो ६७ तकां मियाच्वंगु दुसा खुद्रा व्यापारीं प्रति किलो १३० तका कायेगु यानाच्वंगु दु ।

थीथी खुद्रा बजारय् बजाः भाः नं थीथी हे कायम जुयाच्वंगु खनेदु । छगू हे सामानया भाः नं थाय् कथं आपालं पानाच्वंगु दु । सरकारं मोहनि नखःया झ्वलय् बजार अनुगमन यायेगु धाःसां नं खास हे अनुगमन यायेगु ज्या जुयामच्वंगु कालिमाटीया व्यापारीतय्सं धाःगु दु । कालिमाटी थोक बजारय् किसानपाखें उत्पादन जूगु तरकारी तप्यंक खुद्रा व्यापारीया थाय् थ्यंकेगु योजना सरकारं दयेकूगु खःसां नं उगु योजना कार्यान्वयन गबलेनिसें जुइ धइगु खँ धाःसा धाये फयाच्वंगु मदु ।

नखःया इलय् बजाः भाः थहां वनाः उपभोक्ता मारय् लानाच्वंगु दु । अथेहे सरकारं चिनीया भाः नियन्त्रण यायेगु धाःसां नं व्यापारीतय्सं लाक्वपाक्व भावं चिनी मियाच्वंगु दु । सरकारं प्रति किलो चिनीया ७० तका क्वःछिनातःसां नं खुद्रा पसलय् प्रति किलो ८५ तकां मियाच्वंगु दु ।
थ्व बाहेक जाकि, बजि, केँ लिसें थीथी बूबःया भाः नं सी मदयेक न्हिंन्हिं हे थहां वनाच्वंगु दु ।

सम्बन्धित बुखँ

LEAVE YOUR COMMENTS