सरकारयाके शहीदया यकिन तथ्यांक मदु

देय् व जनताया हक अधिकारया निंतिं थःगु प्राण आहुति बिउपिं शहीदया लुमन्तिइ वि.सं. २०१२ निसें हे माघ १६ गते शहीद दिवस न्यायेकेगु याइ तर आतक गुलि शहीद घोषणा जुल धइगु यकिन तथ्यांक मदु ।सरकारं दँय्दसं माघ १० गतेनिसें १६ गते तक थीथी ज्याझ्वः यासें शहीद सप्ताह हना वयाच्वंगु दु । वि.सं. २०१२ निसें हे येँ महानगरपालिकाया संयोजकत्वय् दँय्दसं शहीदया लुमन्तिइ थ्व शहीद दिवस ज्याझ्वः याना वयाच्वंगु दु । वि.सं. १९९७ सालय् शहीद शुक्रराज शास्त्री जोशीयात माघ १० गते थनया पचलिइ, धर्मभक्त माथेमायात माघ १३ गते सिफलय् व गंगाल श्रेष्ठ व दशरथ चन्दयात माघ १५ गते शोभाभगवतिइ तत्कालीन शासकपक्षं मृत्युदण्ड बिउगु खः ।

थौं माघ १६ गते शहीद दिवसया न्हिकुन्हु सुथय् शान्तिवाटिका रत्नपार्कनिसें शहीद स्मारक लैनचौरतक नसंचा उलेगु ज्या जुल । प्रधानमन्त्री, मन्त्री, सरकारया उच्चपदस्थ अधिकारी, जनप्रतिनिधि, सुरक्षा निकायया ब्यान्ड बाजा पुचः व मार्चपास टोलिसहितं नसंचा उलाः शहीद स्मारक लैनचौरय् वनाः ज्ञातअज्ञात शहीदप्रति श्रद्धाञ्जली देछायेगु ज्या जुल । नेपालय् न्हापांम्ह शहीद लखन थापा मगरयात माने याइ । वयां लिपा सरकारं वि.सं. १९९७ य् प्रजातन्त्रया निंतिं प्राण आहुति बिउपिं प्यम्ह शहीद — शास्त्री जोशी, माथेमा, श्रेष्ठ व चन्दयात शहीद घोषणा यानाः थीथी ज्याझ्वःपाखें दँय्दसं लुमंकेगु यानाच्वंगु दु ।

पंचायतकालय् प्रजातन्त्र पुनःस्थापनाया निंतिं जूगु आन्दोलनय् तःक्वः तःक्वः आपालं योद्धां सहादत प्राप्त याःसां नं इमिगु बारे धाःसा राज्यं उलि महत्व बिउगु खनेमदु ।२०४६ सालया प्रजातन्त्र पुनःस्थापनाया जनआन्दोलनय् सहादत प्राप्त याःपिं झिंगुम्ह शहीदयात सम्मानस्वरुप सरकारं म्हतिं छगू लाख तका आर्थिक ग्वाहालि यानागु गृह मन्त्रालयं न्ह्यथंगु दु । अथे हे २०६२÷०६३ सालया जनआन्दोलनया झ्वलय् देय्न्यंकं सहादत प्राप्त याःपिं नीखुम्हेसित शहीद घोषणा याःगु खः ।

# सरकारयाके स्पष्ट तथ्यांक मदु
वि.सं. २०६२÷०६३ या जनआन्दोलन लिपा सरकारपतिकं थीथी आन्दोन व घटनाय् सीपिंत नं शहीद घोषणा याना वयाच्वंगुलिइ सर्वसाधारणया असन्तुष्टि दु । लिपांगु पटकय् सरकारं थ्व हे माघ ३ गते थीथी आन्दोलनय् सीपिं १९० म्हेसित शहीद घोषणा याःगु गृह मन्त्रालयया सहप्रवक्ता उमेश ढकालं जानकारी बियादिल । मन्त्रालयं आः वयाः सकल शहीदया तथ्यांक धलः संकलन यानाः स्पष्ट अभिलेख तयेगु शुरु याःगु सहप्रवक्ता ढकालं कनादिल । यद्यपि मन्त्रालयलिसें आतक गुलि शहीद घोषणा यात धइगु बारे स्पष्ट लिसः धाःसा मदु ।

सरकारं २०६७ असार ९ गते शान्ति तथा पुनःस्थापना मन्त्रालयया सिफारिसय् १,६१९ म्हेसित शहीद घोषणा याःगु मन्त्रालयया राहत व तथ्यांक महाशाखाया उपसचिव मीरा आचार्यं जानकारी बियादिल । अथे हे सरकारं २०६५ पुस ९ गते खुद्वः व ३४४ म्हेसित शहीद घोषणा याःगु धाःसां नं उकिया आधिकारिक तथ्यांक धाःसा खनेमदु । लिसें तःक्वः तःक्वःया तराई मधेश आन्दोलन व देय्न्यंकं जूगु पहिचानया थीथी आन्दोलनया झ्वलय् सीपिं गुलिसित शहीद घोषणायात धइगु बारे यकिन तथ्यांक लुया वइमखु । सरकारं अज्याःगु आन्दोलनय् सीपिं व जूगु क्षतिया बारे यकिन यायेत थीथी आयोग गठन याःगु खः ।

देशय् लिपांगु इलय् ल्वापु व दुर्घटनाय् मदुपिंत तकं शहीद घोषणा यायेमाःगु व १० गू लाख आर्थिक ग्वाहालिया निंतिं दबाव बीगु प्रचलनं वास्तविक शहीदया भावनाय् घाःलाःगु शहीदया छेँजःपिनिगु धापू दु । आवश्यक मापदण्ड विना हे हचुवाया भरय् शहीद घोषणा यायेबलय् वास्तविक शहीदप्रति अपमान महसुस जूगु २०६२÷०६३या जनआन्दोलनया झ्वलय् कलंकीइ सहादत प्राप्त याःम्ह शहीद प्रद्मुम्न खड्काया जहान प्रभा खड्काया धापू दु । अथे हे २०६२÷०६३या जनआन्दोलनया झ्वलय् बर्दियाय् गोलीं लानाः सहादत प्राप्त याःम्ह शहीद यामलाल लामिछानेया काय द्रोण लामिछानें नं लाक्वपाक्व शहीद घोषणा यायेगु परिपाटीं शहीद खँग्वःया पवित्रता व स्वच्छतायात बुलुकेगु ज्या जूगु धयादिल ।

सुयात शहीद धायेगु व सुयात मधायेगु धइगु खँय् विवाद वयेवं सरकारं २०६२÷०६३ सालया जनआन्दोलनलिपा उकियात व्यवस्थित यायेत निगू आयोगतकं दयेकल तर उकिया प्रतिवेदन धाःसा आतक नं कार्यान्वयनय् वःगु मदुनि । सरकारं नवराज सुवेदी व मोदनाथ प्रश्रितया संयोजकत्वय् शहीदया मापदण्ड दयेकेत बिस्कं बिस्कं निगू आयोग दयेकूगु खः ।

सम्बन्धित बुखँ

LEAVE YOUR COMMENTS