महर्जन कम्प्लेक्स मापदण्ड अनुरुप

येँ – न्यूरोडस्थित भूगोलपार्कय् दयेकाच्वंगु महर्जन विजनेश एशोसिएट्सं सरकारया हे मापदण्डय् सम्पदामैत्री भवन निर्माण यानाच्वनागु खँ धाःगु दु । मापदण्ड अःखः निर्माण जुयाच्वंगु जनगुनासो वयेवं कम्प्लेक्सया सञ्चालक कृष्णलाल महर्जनं शहरी विकास मन्त्रालय व महानगरपालिका, पुरातत्व विभागया स्वीकृति कयाः हे भवन दयेकाच्वनागु खँ कनादिल ।

“जिमिसं २०७२ फागुनय् पुलांगु होटल क्रिष्टल दुगु जग्गा न्यानाः २०७३ असोजय् कामनपां प्यतँजाःगु भवनया नक्शा पास यानाः न्हूगु सम्पदामैत्री भवन दयेकेगु प्रक्रिया सुरु यानागु खः” वय्कलं पत्रकार सम्मेलनय् कनादिल, “तर छुं मनूतय्सं विश्वसम्पदा धलःया हनुमानध्वाखा दरबार लिक्क मापदण्ड अःखः व्यावसायिक भवन दयेकाच्वन धकाः पंगः थनेगु ज्या यानाच्वंगु दु ।’

महर्जनं पुलांगु च्यातँ दुगु होटल क्रिस्टल स्यंकाः थःपिंसं प्यतँ जक दुगु व्यापारिक एशोसिएट्स भवन निर्माण यायेत्यनागु खँ नं कनादिल । भवन निगू अर्ब तका खर्च यानाः दयेकाच्वंगु खः ।

सम्बन्धित बुखँ

LEAVE YOUR COMMENTS