हानं ब्ल्याक मनि पिकायेगु मौका

नेकपा एमालेया अध्यक्ष लिसें पुलांम्ह प्रधानमन्त्री केपी ओलीं सम्पत्ति शुद्धकिरण (मनि लाउन्डरिङ) सम्बन्धी नीति हिले फइगु संकेत बिउगु दु । म्हिगः नेपाल चेम्बर अफ कमर्सया न्हू निर्वाचित पदाधिकारीपिंत पार्टी ज्याकुथी भिंतुना बीत ग्वसाः ग्वःगु ज्याझ्वलय् न्ववासें वय्कलं थ्व संकेत बियादीगु खः ।

वय्कलं थःपिनि सरकार वयेवं छक्वःया निंतिं स्वयम् सम्पत्ति घोषणा याकाः उगु ध्यबायात लगानी यायेगु वातावरण दयेकेगु बारे सोचे यायेमाःगु खँ धयादीगु खः । वय्कलं सम्पत्ति शुद्धीकरण सम्बन्धी आः नेपालं नालाच्वंगु नीति छुँया गःपतय् धराप तयेगु थेंज्याःगु ज्या जक जूगु खँ नं धयादिल । नेपाःया व्यापारीतय्सं ताः ई न्ह्यवंनिसें स्रोत खुले मजूगु सम्पत्ति सार्वजनिक यायेमाःगु माग याना वयाच्वंगु खःसा तत्कालीन इलय् डा. बाबुराम भट्टराई अर्थमन्त्री जुयाच्वंगु इलय् स्वयम् सम्पत्ति घोषणा यायेगु ज्या जूगु खः । थ्व ज्याया कारणं अबले डा.भट्टराईया आपालं प्रशंसा जूगु खः ।

अध्यक्ष ओलीं न्ह्यःने धयादिल, ‘लगानीयात मनि लाउन्डरिङ माने यायेगु कि मयायेगु ? लाउन्डरिङया न्हूगु परिभाषा छु खः ? यदि मजिउगु खःसा थुकिया परिभाषा हिउसां जिउ ।’

अध्यक्ष ओलीं छगू निश्चित ई बियाः सम्पत्तिया अभिलेखीकरण याकेबीगु संकेत नं बियादीगु दु । वय्कलं छगू कट अफ प्वाइन्टयात आधार दयेकाः सुचुका तःगु ध्यबायात शुद्धीकरण यायेगु व सरकारं उकी कर कायेगु जुइ धायसें यदि थथे याये मफुत धाःसा थ्व ध्यबा क्यासिनोय् वनी धयादिल ।

तर विज्ञतय्सं धाःसा सम्पत्ति शुद्धीकरण यायेगु ज्या उलि अःपु मजूगु खँ धाःगु । मनि लाउन्डरिङ सम्बन्धी कानून नेपालं थःगु देय्या निंतिं जक दयेकूगु मखुसे अन्तर्राष्ट्रिय समुदायलिसे प्वंकूगु प्रतिवद्धताय् आधारित जूगुलिं थ्व ज्या उलि अःपू मजूगु विज्ञतय् धापू दु ।

विश्वय् मनि लाउन्डरिङयात सामान्य विषय मखुसें गम्भीर अपराधया रुपय् कायेगु यानाच्वंगु दु । विशेष कथं आतंकवादी पुचःतय्सं थीथी कथं आर्जन यानातःगु ध्यबा शुद्धीकरण यायेगु ज्या जुयाच्वंगु व उकिं आतंकवादयात प्रश्रय बियाच्वंगु धासें थुकियात गम्भीर अपराध तायेकेगु यानाच्वंगु दु । वंगु छुं दँ न्ह्यः मनि लाउन्डरिङ सम्बन्धी कानुनी प्रबन्ध मयाःगु धासें एफएटीएफं नेपाःयात हाकुगु धलखय् तयेगु लिसें अन्तर्राष्ट्रिय व्यापारय् प्रतिबन्ध तयेगु ख्याच्वः समेत बिउगु खःसा हाकुगु धलखय् मलायेमा धकाः नेपालं हथाय् हथासं सम्पत्ति शुद्धीकरणया कानून दयेकेगु लिसें विभाग तकं गठन याःगु खः ।

सम्बन्धित बुखँ

LEAVE YOUR COMMENTS