ने. सं. ११४४ चौलाथ्व अष्टमी -

इन्डोनेसियाय् भुखाचं पीडितपिंत उद्धारय् समस्या

इन्डोनेसियाया सुलवेसी द्वीपय् निन्हु न्ह्यव वःगु तःभुखाचं पीडितपिनि उद्धार ज्या थाकुयाच्वंगु खँ धाःगु दु । सुलवेसी द्वीपय् भुखाय् लिपा ६ मिटर तक तजाः जुइक समुद्री लःबटू दनावयेक सुनामी वःगु खः ।थ्व भुखाय् व सुनामीइ लानाः सीपिनि ल्याः ८३२ थ्यनेधुंकू दुसा अझं सीपिनि ल्याः अप्वयेफुनि धाःगु दु ।

भुखाय् व सुनामीं प्रभावित सुलावेसीया दकलय् तःधंगु शहर पालुइ अझ नं छेँ दुनाः ल्हानाच्वंपिंत लिकायेगु कुतः जुयाच्वंगु दु ।क्वथ्यंके दुनावःगु छगू होटलं खुइम्हं मल्याक मनूतय्त सुरक्षित लिकायेगु निंतिं उद्धारकर्मीत चछिन्हिछिं लगे जुयाच्वंगु दु । तर आवश्यक तःधंगु उपकरण हयेमफयां उद्धार ज्याय् तच्वःगु समस्या वयाच्वंगु दु ।

सरकारं सतक व खुल्ला थासय् राहत क्याम्प चले यानाच्वंगु दु । अस्पतालत नं दुनावःगुलिं घाःपाः जूपिंत नं खुला थासय् हे तयाः उपचार यानाच्वंगु दु ।भुखाय् व सुनामीं छक्वलं हे लखौं मनूतय् जीवन तहस नहस यानाबिउगु दु । पीडितपिनि नयेत्वनेगु लिसें लःया तकं समस्या जुयाच्वंगु दु । मनूतय्सं पसलय् छु दु व हे ज्वनाः वनाच्वंगु दु । सरकारं पसःथुवाःतय्त लिपा ध्यबा पुलाबीगु आश्वासन बिउगु दु ।

भुखाय् लिपा पालुइ थ्यंकःवंम्ह राष्ट्रपति जोको विडोडों सरकारं फुचाःगु फुक्क कथंया ग्वाहालि बी धयादीगु दु । पालु थ्यंकेगु अप्वः थें सतक स्यंगु लिसें हवाइ अड्डाय् नं क्षति जूगुलिं उद्धार ज्वलं नं याकनं थ्यंकेमफइगु खँ धाःगु दु ।भुखाय् केन्द्रविन्दु लिक्कसं लाःगु डोंगाला शहरय् अप्वः क्षति जूगु नापं सतक स्वापू नं त्वाःथःगुलिं अनया अवस्था तकं बांलाक सीमदुनिगु खँ धाःगु दु ।