ध्यबा नकाः जग्गा कित्ताकाट
येँ – सरकारं देय्न्यंकं जग्गा कित्ताकाट बन्द यानातःसां दुनें दुनें धाःसा कित्ताकाट जुयाच्वंगु सीदुगु दु । भूमाफियातय्सं लाथेपाथे जग्गा कित्ताकाट याना–च्वंगुलिं देन्य्न्यंकं कित्ताकाट बन्द याःगु खः । तर भूमाफिया व मालपोत कार्यालयया कर्मचारीत मिले जुयाः दुनें दुनें कित्ताकाटया ज्या धाःसा यानां तुं च्वंगु खँ सूत्रं धाःगु दु ।
कर्मचारीतय् लागिं सरकारं कित्ताकाटय् तयातःगु प्रतिबन्ध हे आः कमे यायेगु माध्यम जुयाच्वंगु दु । कित्ताकाट बन्द जूगुलिं जग्गा आवश्यक जूपिंसं छगू जग्गा कित्ताकाट यायेगु निंतिं कर्मचारीतय्त निगू लाखंनिसें न्यागू लाख तका तक घुस बीमाःगु खँ छम्ह पीडितं कंगु दु । सरकारं भूमाफियातय् चलखेल पनेत धकाः प्रतिबन्ध तःगु खःसां उकिया मार धाःसा सर्वसाधारण जनतायात लानाच्वंगु दु ।
थः मचायात विदेशय् ब्वंके छ्वयेत यलया मालपोतय् जग्गा मिउ वयाच्वंम्ह छम्ह नां कने मयःम्ह जग्गा थुवालं थःगु जग्गाया कित्ताकाट जुइमखु धाःगुलिं समस्या जुयाच्वंगु खँ कँसें कर्मचारीयात घुस नकाः जूसां कित्ताकाट यानाः जग्गा मीत बाध्य जूगु खँ कन । वय्कःया कथं ३ आना जग्गा कित्ताकाट यायेगु निंतिं प्यंगू लाख तका ध्यबा बीमाःगु खः ।
कर्मचारीं थुलि ध्यबा फ्वंबलय् थ्व ला तसकं अप्वः मजू ला धकाः थम्हं न्यनाबलय् कर्मचारीं थ्व ध्यबा थःपिंसं जक नयेगु मखु, च्वय् च्वय् थ्यंक भाग बीमाः धकाः लिसः बिउगु खँ नं वय्कलं ‘नेपालभाषा टाइम्स’ यात कनादिल । अथे हे येँया कलंकी मालपोतया हालत नं अथे हे जुयाच्वंगु दु ।
छेँजः छम्ह विरामी जुयाः वासः यायेत जग्गा मीत बाध्य जूम्ह छम्ह मनुखं कनादी कथं जग्गा मी धाःसा घुस हे यक्व नकेमाः, ममी धाःसा वासः यायेत ध्यबा व्यवस्था याये फयाच्वंगु मदु । अथे जुयाः घुस नकाःसां जग्गा कित्ताकाट यानाः मीत बाध्य जूगु खँ वय्कलं कनादिल ।
सरकारं जग्गाया कित्ताकाटय् प्रतिबन्ध तयेधुंकाः थ्व समस्या येँ, यल जक मखु देय्न्यंकं तच्वया वनाच्वंगु दु । अले थुकिया अप्वः मार धाःसा सर्वसाधारण जनतायात लानाच्वंगु दु ।
LEAVE YOUR COMMENTS