ने. सं. ११४४ चौलाथ्व एकादशी - कामदा एकादशी

यकिं दह : पर्यटकीय गन्तव्य

येँ देय्या दकलय् तःजिगु नखः येँयाःया इलय् श्रीकुमारि, श्रीगणेश व श्री भैरवया द्यःखः सालाः जात्रा न्यायेकेगुनापं थीथी देवीदेवताया प्याखं क्यनेगु थुकिया विशेषता खः । यंलाथ्व द्वादशिकुन्हु हनुमानध्वाखास्थित कालभैरव द्यःया न्ह्यःने ३२ कू हाकःगु यःसिं थनेवं शुरु जुइगु येँयाःबलय् थ्वकुन्हुनिसें हे थीथी द्यःप्याखं त्वाःत्वालय् क्यनेगु नं शुरु जुइ ।

येँयाः शुरु जूगु स्वन्हु दुकुन्हु यंलाथ्व चतुर्दशिकुन्हु जीवित देवी श्रीकुमारि, श्रीगणेश व श्रीभैरवया द्यःखः क्वनेपाखे साली । थुकियात क्वनेयाः धाइ । क्वःनेयाःकुन्हु बसन्तपुलिं द्यःखः साला हयाः क्वनेया थीथी त्वाः जुयाः बसन्तपुलिं तुं थ्यंकाः याः न्यायेकी । द्यः याः न्यातकि थ्व कुन्हु दागिं पिहां वइ । दागिं धइम्ह इन्द्रया मां खः ।

वसुन्धराया धलं दनेत पालिजाः स्वां खू वःम्ह इन्द्रयात चिनातःगुलिं थः काययात त्वतकेत दागिं स्वयम थः हे पृथ्वीलोकय् वःगु इलय् थः मदयेधुंकूपिं पितृयात स्वर्ग यंकेगु कबुल ल्हाकाः इन्द्रयात त्वःता बिउगु खःसा थथे पितृयात स्वर्ग यंकेत मालेगु झ्वलय् शुद्ध जुयाः स्वर्गय् वनेगु निंतिं यकिं दहय् वनाः म्वःल्हुइमाः धइगु धापू दु ।

धार्मिक, सांस्कृतिक व ऐतिहासिक महत्व कुबियातःगु थ्व यकिं दह थौंया इलय् वयाः पर्यटकीय गन्तव्यया रुपय् विकास जुजुं वनाच्वंगु दु । चन्द्रागिरि नगरपालिका –१ य् लाःगु उगु थाय् पर्यटकीस्थलया रुपय् विकास जुजुं वनाच्वंगुलिं उगु थासय् सर्वसाधारणया आकर्षण अप्वया वनाच्वंगु दु ।

दँय्दसं यंलाथ्व पुन्हि (येँयाःपुन्हि) कुन्हु कुन्हु यकिं दहलय् म्वःल्हुत तःधंगु हे मेला जुया वयाच्वंगु दु । मेला्य् येँनापं उकिया जःखः च्वंगु थासं नं आपालं मनूत वयेगु याः । मेलाय् छुंकथंया नं संकट वा समस्या मवयेमा धकाः वंगु सोमवाः सनिलय् अन यकिं दह व उकिया जःखःया लागाय् दीप प्रज्वलन यायेगु ज्या जुल ।

थ्व हे झ्वलय् लाकाः ‘स्वक्वःगु यकिं दह पर्यटन महोत्सव’ तकं शुरु जूग्ु दु । छन्हुयंकंया महोत्सवय् वःपिं पर्यटकतय्त उगु थाय्या धार्मिक व मेमेगु पर्यटकीय वस्तुस्थितिबारे जानकारी बिउगु खः । चन्द्रगिरि नगरपालिका –१ (यकिं दह)या वडाअध्यक्ष राजेन्द्र केसीयाकथं मेलाय् वइपिंत सुविधा व मेला व्यवस्थित रुपं संचालन यायेत स्थानीय जनप्रतिनिधि, सुरक्षाकःमिलिसें सछिम्ह स्वयसेवक परिचालन याःगु खः ।

वय्कलं मेला व्यवस्थापनया निंतिं वडा ज्याकू छगू लाख तका ग्वाहालि यानागु जानकारी बियादिल । सुथंनिसें म्वःल्हुइत व दर्शनया निंतिं व्यवस्था यानातःगु उगु थासय् छन्हुया दिनय् नीद्वः मनू वःगु अनुमान याःगु दु ।जामाच्व व चन्द्रगिरि निगू डाँडाया दथुइ लाःगु यकिं दहया तजाःगु च्वका छायेपियातःगु खने दुगु खः ।

पौराणिककालय् स्वर्गया जुजु इन्द्र यकिं दहय् वयाः म्वःल्हुयाः स्वर्ग वंगु धइगु धापू दु । उगु थासय् येँयाःपुन्हिया न्हिकुन्हु म्वःल्हुल धाःसा छेँजःपिनि दथुइ सुख शान्ति, समृति व मोक्ष प्राप्त जुइ धइगु जनविश्वास दु । समुद्री सतहं ६००० फिट च्वय् लाःगु उगु डाँडायात स्वर्ग वनेगु स्वाहानेया रुपय् स्थानीयवासीतय्सं कायेगु याः ।

कलंकीपाखें करिब ९ किलोमिटर तापाःगु यकिं दह वनेगु लँपु कालोपात्रे जुइ मफुगुलिं यात्रुतय्सं धाःसा समस्या फयेमालाच्वंगु दु ।
सांस्कृतिक ल्याखं अतिकं महत्वं जाःगु यकिं दहयात पवित्र तीर्थस्थलया रुपय् विकास यायेत आवश्यक पूर्वाधारया विकास यायेगु चन्द्रगिरि नगरपालिकाया उपप्रमुख लिसा नकःमिं धयादिल ।

इन्द्र, इन्द्रयणी व नारांद्यःया देगः दुगु उगु लागाय् बासुकी नागया ल्वहं तकं खंके फइ । दृश्यावलोकन स्तम्भ, बहुउद्देश्यीय भवन लगायतया पूर्वाधार निर्माण शुरु जुयाच्वंगु दु । यकिं दह करिब २०० रोपनी क्षेत्रफलय् न्यनाच्वंगु दु ।

गोरखाया जुजु पृथ्वीनारायण शाहं स्वनिगलय् आक्रमण याये स्वयां न्ह्यः शक्तिपीठया रुपय् स्थापना यानातःगु मनकामना देगः व कालु पाँडेया समाधिस्थल नं थ्व हे डाँडाय् लानाच्वंगु दु ।प्राचीन गढी व नीलगिरि, धौलागिरि, माछापुच्छ«े, अन्नपूर्ण, मनास्लु, गणेश, लाङटाङ, गौरीशंकर थेंज्याःगु हिमाल थुगु थासं स्वये खनी ।

येँ निर्वाचन क्षेत्र नं. ९ लय् लाःगु थुगु क्षेत्रं निर्वाचित सांसद कृष्णगोपाल श्रेष्ठं उगु क्षेत्रय् च्वंगु न्ह्यइपुसे, यइपुसे व पर्यटकीय क्षेत्रयात महत्वपूर्ण गन्तव्यया रुपय् विकास यायेत आवश्यक गृहकार्य जुयाच्वंगु जानकारी बियादिसें उगु थाय्यात राष्ट्रिय व व अन्तर्राष्ट्रियस्तरय् प्रवद्र्धन याना यंके फत धाःसा पर्यटकीय माध्यमं आर्थिक विकासय् तःधंगु ग्वाहालि जुइगु विश्वास प्वंकादिल ।

धार्मिक व प्राकृतिक सम्पदां जायाच्वंगु उगु डाँडापाखें खने दुगु गोरखा, नुवाकोट, रसुवा, धादिङ व स्वनिगःया यइपुसे च्वंगु लुं यक्वसिगु नुगः त्याकेत सफल जुयाच्वंगु दु । न्ह्यइपुसे च्वंगु डाँडा दुगुलिं हाइकिङ, बाइकिङ व साइक्लिङया निंतिं नं आपालं सम्भावना दु ।

स्वनिगःया थीथी थासं उगु थासय् चाःहिलेत व गुँभ्वय् न्यायेकेत आपालं मनूत वयेगु यानाच्वंसां पर्यटन क्षेत्रया विकासया निंतिं आपालं सम्भावना दुगु थ्व थासय् पर्यटकीय सुविधाया निंतिं अत्याधुनिक होटल, रेष्टुराँ, रिसोर्ट धाःसा दयेके फयाच्वंगु मदु ।