देउवाया निर्णयं राज्ययात १ खर्ब भार

येँ – प्रधानमन्त्री शेरबहादुर देउवाया सरकारं थौंकन्हय् यानाच्वंगु थीथी कथंया भत्ता वृद्धिया कार्यक्रमत फुक्क कार्यान्वयन जुल धाःसा थ्वहे दँय् देय्यात १ खर्ब तकाया आर्थिक भार लाइगु खँ अर्थविद्तय्सं धाःगु दु । सरकारं छुं न्हि न्ह्यः तिनि भूकम्पपीडितयात थप छगू लाख तका आर्थिक ग्वाहालि व ६५ दँय् हे वृद्धभत्ता बीगु निर्णय याःगु खः । वृद्धभत्तां दँय् १४ अर्ब तकाया आर्थिक भार लाइ गुगु हरेक दँय् अप्वया वनी । भुखाय् पीडितयात बीगु राहतं धाःसा आःयात ७४ अर्ब तका आर्थिक भार लाः वनी ।

थुकिया नापनापं सरकारं थीथी कथंया तःधंगु ल्वचं ग्रस्त जुयाच्वंपिं विरामीतय्त वार्षिक भत्ता, कासामितय्त भत्ता, याकः मिसा, असहाय आदिपिंत नं भत्ता बीगु धकाः निर्णय याःगु दु । थुकिं अझ थप आर्थिक भार लाः वनी ।सरकारं याःगु निर्णयया प्यखेरं विरोध जुइवं सरकारय् च्वंपिं मन्त्रीतय्सं थ्व ध्यबा थ्वहे वर्षय् खर्च यायेगु मखु, आकिवं बजेट विनियोजन यानाः जक खर्च यायेगु खः धकाः स्पष्टीकरण बियाहःगु दु । लिसें उमिसं चित्त बुझे मजूसा न्हू वइम्ह सरकारं थुकियात खारेज याःसां जिउ धकाः हाथ्या नं बिउगु दु ।

थौंकन्हय् नं सरकारं बजेटय् विनियोजन याना तःगु स्वयां फरक कथं रकमान्तरण यानाः दां खर्च यानाच्वंगु दु । अथे रकमान्तरण याःगु ध्यबा मध्ये दकले अप्वः दां नेपाली सेनां यंकाच्वंगु खँ नं सीदुगु दु । बजेटय् उल्लेख यानातःगु मदुसां सरकारं सेनायात हेलिकप्टर न्यायेत १ अर्ब ७० करोड तका व मेमेगु सैन्य हलंज्वलं न्यायेगु लागिं धकाः थप १ अर्ब ५० करोड दां निकासा यायेधुंकूगु दु । थ्वहे झ्वलय् देउवा सरकारं पाहांपिंत स्वागत सत्कार धइगु नामय् जक हे पुस महिनाय् १ करोड ५० लाख तका दां खर्च यानातःगु सीदुगु दु ।

सम्बन्धित बुखँ

LEAVE YOUR COMMENTS