च्याम्पियन्स लिग मेसीया ह्याट्रिक लिभरपुल, मिलान त्यात
मंगलबाः निसें युइएफए च्यापियन्स लिग अन्तर्गत समुह चरणया कासा शुरु जूगु दु । समूह चरण अन्तर्गत जूगु न्हापांगु कासाय् समुह बी पाखे बार्सिलोनां डच क्लब पीएसभी इन्डोभानयात ४—० गोलं बुकूगु दु । बार्सिलोनाया निंतिं कप्तान लियोनल मेसीं ह्याट्रिक यात । न्हापांगु हाफया ३२ औं मिनेटय् कप्तान मेसीया फ्रिकिकं अग्रता काःगु खः।
निगूगु हाफया ७५ औं मिनेटय् उसमान डेम्बेले गोल याःगु खः। मेसीं कासा याःगु ७७ औं मिनेटय् व्यक्तिगत निगूगु गोल व ८७ औं मिनेटय् ह्याट्रिक याःगु खः । मेसीया थ्व थःगु करियरया ४८ औं ह्याट्रिक खः । कासा न्ह्याःगु ७८ मिनेटय् बार्सिलोनाया डिफेन्डर सामुएल उमटिटीं निगू म्हासु कार्ड नया मैदान त्वःते माःगु खः।
समुह बी पाखे हे इन्टर मिलानं टोटनह्यामयात २—१ गोल बुकूगु दु । कासाया निगूगु हाफया ५३ औं मिनेटय् क्रिष्टियन एरिक्सनया गोलं टोटनह्यामं अग्रता काःगु खःसां छगू गोलं लिउने लाःगु मिलानया निंति कासाया ८५ औं मिनेटय् आइकार्डीं व इन्जुरी इलय् वेसिनो गोल यायेवं टोटनह्यामं पराजय फयेमाल ।
अथेहे समुह सी अन्तर्गत जूगु कासाय् लिभरपुलं पेरिस सेन्ट जर्मनयात ३—२ गोलं बुकल । लिभरपुलया निंतिं कासाया ३० औं मिनेटय् स्टरिज व ३६ औं मिनेटय् जेम्स मिल्नरं पेनाल्टीं गोल याःगु खः । न्हापागुं हाफया ४० औं मिनेटय् पिएसजीया निंतिं मुनिर व निगूगु हाफया ८३ औं मिनेटय् एम्बापें गोल यानाः कासा बराबरीइ हःगु खः ।
तर इन्जुरी इलय् फिर्मिन्हों लिभरपुलया निंतिं विजयी गोल यानाबिल । थ्व हे समूहय् लाःगु नेपोली व रेड स्टार बेलगे्रड दथुया कासा धाःसा गोलरहित बराबरीइ क्वचाल ।समुह ए पाखे एथ्लेटिको म्याड्रिडं मोनाकोयात २—१ व बोरुसिया डर्टमनं क्लब बर्गयात १—० गोलं बुकल । समुह डी पाखे गालाटासारें लोकोमोटिभ मस्कोयात ३—० गोलं बुकूगु दु । थ्व हे समूहय् शाल्के व पोर्टोे दथुया कासा १—१ गोलया बराबरीइ क्वचाल ।
LEAVE YOUR COMMENTS