स्वंगू किलोमिटर लँ दयेकेगु ज्या न्ह्यात

किपु नगरपालिकां अमृतनगरनिसें गुम्बा तक स्वाइगु स्वंगू किलोमिटर लँ दयेकेगु ज्या न्ह्याकूगु दु । काठमाडौँ उपत्यका विकास प्राधिकरणया ग्वाहालिइ उगु क्षेत्रय् खुगू मिटरया न्हूगु लँ (ट्रयाक) चायेकेत्यंगु खः। किनपा वडा नम्बर–१ अमृतनगर व २ मैत्रीनगर जुयाः गुम्बा क्षेत्रय् स्वाइगु उगु लँपु खुलाया दुने ग्राभेल यानाः सञ्चालनय् हयेत्यंगु खः । न्हूगु लँपुं उगु क्षेत्रया जनतायात थःपिंसं उत्पादन याःगु सामान बजारय् छ्वयेत अपुइगु खँ धाःगु दु ।किनपा प्रमुख रमेश महर्जनं उगु लँपु दयेकेगु निंतिं तत्काल ४० लाख तकया बजेट विनियोजन यानागु खँ कनादिसें वइगु न्हिं उगु लँपुं दयेकेगु निंतिं माःगु ध्यबा व्यवस्था यायेगु खँ कनादिल ।

वय्कलं प्राचीन महत्वया स्थानीय मठमन्दिर व सम्पदा संरक्षण व भौतिक पूर्वाधार विकासया यायेगु नीति नगरपालिकां दयेकाच्वंगु खँ नं कनादीगु दु । थुगु परियोजना पूवनधाःसा येँ मनपा–१४ वडाया खसीबजार क्षेत्रयात स्वाइगु जुइ । उगु लँपुं चन्द्रागिरी नगरपालिकाया क्षेत्रय् वनेगु निंतिं नं चीहाकगु व वैकल्पिक मार्गया रुपय् विकास याये फइगु खँ धाःगु दु । चन्द्रागिरी वनिपिं यात्रुया निंतिं कलंकी जुयाः वनेमाःसा उकिया विकल्पया रुपय् नं थुगु लँपुयात छ्यलेफइगु खँ धाःगु दु ।