रेडक्रसया अन्तर्राष्ट्रिय साझेदारी बैठक

येँ – नेपाल रेडक्रस सोसाइटीया साझेदारी बैठक म्हिगःनिसें थन शुरु जूगु दु । रेडक्रसया अन्तर्राष्ट्रिय महासंघ व अन्तर्राष्ट्रिय रेडक्रस समितिया प्रतिनिधिसहितया निन्हुयंकंया बैठक शुरु जूगु खः । मानवीय सेवाया गतिविधियात हिला वनाच्वंगु परिस्थितिइ गुकथं प्रभावकारी रुपं संचालन याये फइ धइगु खँय् केन्द्रीत जुयाः उगु बैठक जूगु खः ।

बैठकय् नेपाल रेडक्रसं कार्यान्वयन यानाच्वंगु न्हय्गूगु योजना, अति संकटापन्न जनताया जीवनस्तर थकायेत म्हितेमागु भूमिका, सकतां कथंया प्राकृतिक विपदया समाधान गुकथं यायेगु, रेडक्रसया सुदृढीकरणया निंतिं म्हितेमाःगु भूमिका लगायतया विषययात कयाः बैठकय् सहलह जुयाच्वंगु दु ।

लिसें २०७२ साल बैशाखया विनाशकारी तःभुखाय् व थगुने तराइ–मधेश लागाय् वःगु खुसिबाः व उकिं पीडित जूपिनिगु उद्धार, खोज व राहत लगायतया थीथी ज्याझ्वःयात कयाः नं समीक्षा जुइ धाःगु दु ।

हरेक निदँय् छक्वः रेडक्रसं थुकथंया साझेदारी बैठक च्वनेगु याना वयाच्वंगु खःसा थुगुसीया बैठकय् तःभुखाचं अति प्रभावित जूगु देय्या झिंप्यंगू जिल्लाय् संचालन जूगु ज्याझ्व व उकिया उपलब्धियात कयाः नं सहलह याइगु जूगु दु । नेपाल रेडक्रसं नेपाःया स्वास्थ्य, मानवीय सेवा नापं रक्तmंचारया क्षेत्रय् सेवा बियाच्वंगु दु ।

सम्बन्धित बुखँ

LEAVE YOUR COMMENTS