विश्वकप २०१८

फास्ट ट्रयाक व पाइप लाइन छक्वलं दयेकेगु बारे सहलह

येँ – नेपाल आयल निगमं निजगढ फास्ट ट्रयाकलिसें पेट्रोलियम पाइपलाइन नं नापं दयेकेगु प्रस्ताव तःगु दु । निगमं उकिया निंतिं थःम्हं हे वित्तिय स्रोत मुंकेगु खँ धाःगु दु । निगमया कार्यकारी निर्देशक सुशील भट्टराईं नेपाली सेनालिसे उकिया बारे औपचारिक रुपं सहलह जूगु खँ कनादीगु दु । भारतीय कम्पनीं तयार याःगु डिपिआरय् नं फास्ट ट्रयाकया लिसें पेट्रोलियम पाइप लाइन हयेगु खँ न्ह्यथनातःगु खः ।

तर आः नेपाली सेनां भारतीय कम्पनीं दयेकूगु डिपिआरया ध्यबा अप्वः धाःगुलिं यानाः थःपिंसं हे डिपिआर दयेकेगु तयारी यानाच्वंगु दु ।
सरकारं नं फास्ट ट्रयाकया डिपिआर दयेकेगु झ्वलय् पेट्रोलियम पाइप लाइन हयेगु कथं हे दयेकेत सेनायात निर्देशन बिउगु दु । लिसें लःया पाइप, अप्टिकल फाइबर, ग्यास, विद्युत प्रशारण लाइनानं भूमिगत रुपं दयेके फइ कथंया संरचना तयार यायेत सेनायात धाःगु दु ।

आयल निगमं सडकया लिसें थज्याःगु संरचना तयार यानाः जक तःसां नं लिपा ज्या यायेत अपुइगु धासें पाइप लाइन लायेत प्रस्ताव याःगु खः । छक्वलं ज्या यायेफइगु जुयाः निगमं सरकारयात नं उकिया निंतिं पहल यायेत इनाप याःगु दु । पटक पटक सडक स्यंकेगु स्वयां छक्वलं निगुलिं परियोजनायात पूवंके फइगु जूगुलिं थुकिं आर्थिक रुपं नं फाइदा जुइगु निगमया धापू दु ।

भारतं आः मोतिहारीनिसें पथलैया जुयाः अमलेखगञ्ज तक पाइप लाइन लायेत्यंगु दु । निगमं पथलैया तक वइगु पाइप लाइन येँ तक हयेगु निंतिं फास्ट ट्रयाकयात हे छ्यलेगु नीति काःगु दु । फास्ट ट्रयाक जुयाः पाइप लाइन स्वनिगलय् थ्यन धाःसा निगमं यलय् पेट्रोलियम पदार्थ भण्डारण यायेगु योजना दयेकूगु दु । यलय् तक पाइप लाइन हयेफत धाःसा स्वनिगलय् पेट्रोलियम पदार्थ इनेगु ज्या अपुइगु निगमया अनुमान दु ।

सम्बन्धित बुखँ

LEAVE YOUR COMMENTS