बालं च्वनीपिंलिसे सम्झौता अनिवार्य

‘येँ – छेँय् बालं च्वनीम्ह व छेँथुवाः दुथुइ अनिवार्य रुपं सम्झौता यायेमाःगु जूगु दु । वइगु भदौ १ गते निसें लागू जुइगु मुलुकी देवानी (संहिता) ऐन २०७४ या परिच्छेद९ स न्ह्यथनातःगु छेँ सम्बन्धी व्यवस्थाय् थज्याःगु सम्झौता अनिवार्य यानातःगु खः ।थुगु व्यवस्थां यानाः छेँ थुवाःया लिसें बालं च्वनीपिंत नं अःपुइगु खँ धाःगु दु ।

छेँथुवाः व बालं च्वंपिंत कानुनी दायराय् हयेत थ्व व्यवस्था याःगु खँ धाःगु दु । लागू जुइत्यंगु थुगु कानूनय् छेँथुवाः व बालं च्वनीपिनिगु कर्तव्य व दायित्व नं न्ह्यथनातःगु दु ।ऐनय् छेँथुवालं बालं च्वनाच्वंगु क्वथा थःत माःगु खःसा ३५ न्हु न्ह्यः सुचं बीमाःगु व्यवस्था यानातःगु दु ।

यदि उगु क्वथा खाली जुइधुंकाः छेँथुवालं थम्हं मछ्यसे तत्काल मेपिंत बी मदइगु व्यवस्था नं ऐनय् यानातःगु दु । बालं च्वंम्ह थना छ्वयेधुंकाः स्वला तक मेपिंत बालं तयेमदइगु व्यवस्था ऐनय् दु । यदि छुं गथे बालं तयेमाल धाःसा न्हापा च्वनाच्वंम्हेसित हे बालं तयेगुली प्राथमिकता बीमाःगु व्यवस्था नं ऐनय् यानातःगु दु ।

सरकारया थुुगु व्यवस्थां छेँथुवालं गुलिं ध्यबा बालं तःगु व बालं च्वंम्हेस्यां गुलि पुलाच्वंगु धइगु स्पष्ट जुइगु व छेँथुवाः व बालं च्वंम्ह निखलःसित कानुनी दायरय् हयेधुंकाः राजश्वया दायराय् छेँथुवाः वयेमाःगु अवस्था ब्वलनीगु खँ धाःगु दु ।

सम्बन्धित बुखँ

LEAVE YOUR COMMENTS