कलंकीया अण्डरपास छवाःया दुने चाली

येँ – कलंकीया जाम म्हो यायेत दयेकाच्वंगु अण्डरपास छवाः दुने सञ्चालनय् वयेफइगु खँ धाःगु दु । कलंकीनिसें खसी बजाः तका अन्डरपास दयेकेगु ज्या क्वचायेधुंकूगु दु । च्यागू लेनया सतकय् प्यंगू लाइन अन्डरपास दुसा प्यंगू लाइन सतक दु । थुगु अन्डरपास प्यदँया दुने दयेके क्वचायेकेगु धाःगु खःसां तःभुखाय् व नाकाबन्दीया हुनिं दछि लिबाःगु खः ।

कोटेश्वर–कलंकी रिंगरोड विस्तारया ज्या नं अन्तिमय चरणय् थ्यंगु दु । येँ सतक सुधार आयोजनाया कथं कोटेश्वर कलंकी सतकया ज्या ९७ प्रतिशत क्वचायेधुंकूगु दु । उगु खण्डया छुं छुं भागय् जक पीच याये ल्यं दनि ।

१० दशमलव ४ किलोमिटर ताःहाकःगु थुगु सतक दयेकेगु ज्या चिनियाँ सरकारया ग्वाहालिइ चिनियाँ निर्माण कम्पनी संघाइ कन्स्ट्रक्सन ग्रुपं याःगु खः ।थुगु सतक खण्ड दयेकेगु ज्या वइगु डिसेम्बर तक क्वचाइगु खँ नं चक्रपथ सुधार आयोजनां धाःगु दु ।