डाक्टर व नर्स तिपू नं लिपि कक्षाया विद्यार्थी

येँ – तोखाय् थौंकन्हय् न्ह्यानाच्वंगु प्रचलित नेपाल लिपिया छगू कक्षाय् छम्ह मेडिकल डाक्टर व नर्स पेशाय् आवद्ध निम्ह तिपू नं सहभागी जुयादीगु दु । डाक्टर व नर्स तिपू थौंकन्हय् कक्षाया हे आकर्षण विषय समेत जुयाच्वंगु दु । तोखाया हे सपनतीर्थय् च्वनादीम्ह डा. धनबहादुर श्रेष्ठ व नर्स पेशाय् आवद्ध वय्कःया जहान मय्जु चन्द्रकुमारी श्रेष्ठ थौंकन्हय् तोखाया सरस्वती माविइ जुयाच्वंगु लिपि कक्षाय् ब्वति कया च्वनादीगु खः ।

कान्ति अस्पतालय् कार्यरत डा. श्रेष्ठ बालरोग विशेषज्ञ खः । अझ अजूचायापुगु खँ ला छु धायेबलय् दत्या न्ह्यः तिनि इहिपा जूपिं थ्व तिपूया खुला दुम्ह म्ह्याय् छम्ह नं दु । लिपि कक्षाय् वइबलय् वय्कःपिं म्ह्याय्यात नं नापं ज्वनाः झाइ । कक्षा जुयाच्वंगु थाय् व वयकःपिनि छेँ ३ किमि ति तापाः । न्हिंन्हिं वय्कःपिं मोटरसाइकलं कक्षाय् थ्यंकादी ।

तोखाय् लिपि कक्षा जुइगु खँ फेसबुकपाखें सीकागु खःसां गन स्वापू तयेगु मसियाच्वंगु इलय् थःथाय् मचा क्यं वःम्ह छम्ह अभिभावकपाखें सम्पर्क यानाः कक्षाय् सहभागी जुयागु खँ डा. श्रेष्ठं ‘नेपालभाषा टाइम्स’ यात कनादिल । ‘मचाबलय् हे सयेका तये माःगु खँ खः, अबले सयेके मखन । आः सयेके दयाः तसकं न्ह्यइपुसे च्वनाच्वंगु दु’ वय्कलं धयादी ।

डाक्टरी पेशा तसकं लिमलाःगु खःसां आः तक न्हिंन्हिं सनिलय् ६ निसें ७.३० बजे कक्षाय् वने लाका–च्वनागु व कक्षा पूवंक हे कायेगु बिचाः यानाच्वनागु खँ नं वय्कलं कनादिल । झापाय् थःछेँ दुम्ह जहान चन्द्र कुमारी नेवाः भाय् बांलाक मसःसां लिपि सयेके खनाः धाःसा लय्ताः ।

सम्बन्धित बुखँ

LEAVE YOUR COMMENTS