अधिकार मदयाः उपमेयरत असन्तुष्ट

येँ – विकास निर्माणय् थःपिनिगु छुं हे भूमिका मदुगु धासें येँया उपमेयर हरिप्रभा खड्गी श्रेष्ठं आः मेमेपिं उपमेयरत समेत जानाः न्ह्याः वनेगु खँ कनादीगु दु ।वय्कलं न्यायिक समिति, राजश्व परामर्श समिति, अनुगमन समितिइ थःपिं दुसां नं बजेट कार्यन्वयन यायेगु ज्याय् धाःसा थःपिनिगु छुं भूमिका मदुगु खँय् दुःख प्वंकादिल ।

वय्कलं धयादी, ‘जि छम्ह उपमेयर जूगुलिं गुलिखे पासापिंसं वा जनतां थ्व योजना छगू बजेटय् तयेमाली धकाः धाइ, तर मेयरयाथाय् तक उगु खँ थ्यंसां नं उकियात कार्यान्वयन यायेगु ज्या मेयरया जूगुलिं मेयरं बजेट तया मबिल धाःसा जि पदय् दुगुया छुं हे औचित्य मदु । अथेजुयाः उपमेयरयात नं बजेटय् छुं यायेगु अधिकार दयेमाः ।’

बजेटय् छु योजना तयेगु वा मतयेगु धइगु अधिकार फुक्कं मेयरयात जक दुगुलिं थःपिनिगु भूमिका गौण खनेदुु धासें थःपिंत नं बजेटय् छुं अधिकार दयेमाःगु खँ नं वय्कलं धयादिल । थुकिया नितिं बोर्ड बैठकं निर्णय यायेगु ज्या यायेमाः धासें मेयरयात जक बजेटय् अधिकार बीगु ज्या नं कानुनी रुपं नं विभेदकारी जूगु द्वपं वय्कलं बियादिल ।

अधिकार बिया मतःगु कारणं मनपाया कर्मचारीतय्सं नं मेयरयात जक अप्वः माने याइगु खँ नं वय्कलं कनादिल । वास्तवय् उपमेयर जूपिंत अधिकार मदुगु खँ येँय् जक मखु मेमेगु नगरपालिकाया उपमेयरपिंसं नं महसुस यानाच्वंगु जुयाः आः ३ नम्बर प्रदेशय् दुथ्याःगु फुक्कं महानगरपालिका व उप महानगरपालिकाया उपमेयरपिं समेत नापं च्वनाः न्ह्याः वने त्यनागु खँ नं वय्कलं कनादिल ।

सम्बन्धित बुखँ

LEAVE YOUR COMMENTS