असनय् नं गुथि संस्थानया मिखा

येँ – असंया वायु देवता गुथिया छेँयात गुथि संस्थानं टेन्डरं बीत्यंगु ज्यायात असंवासीतय्सं विरोध याःगु दु । थुकिया बारे म्हीग स्थानीय वासिन्दा व उगु छेँय् पसः तयाच्वंपिं पसल्यातय् दथुइ सहलह नं जूगु दु । सहलहं आः याकनं हे संघर्ष समिति स्वनाः गुथि संस्थानया ज्याया विरुद्ध आन्दोलन यायेगु निर्णय याःगु दु ।

गुथि संस्थानं अन पसः तयाच्वंपिंत हे लिपा नं पसः तयेके बीगु धकाः न्हापा भ्वं यानातःगु खःसां आः ठेक्कापाखें राजु गोर्खाली नांया मनूयात बिउगुलिं स्थानीय वासिन्दां उकिया विरोध याःगु खः । पुस्तौंनिसें उगु लागाय् पसः तया वयाच्वनागु खँ कँसें स्थानीय सजिव वज्राचार्यं गुथि संस्थानया निर्णयं स्थानीय वासिन्दायात विस्थापित याइगु जूगुलिं अन गुगुं हालतय् व्यापारिक भवन दयेके मजिउगु खँ कनादिल ।

गुथि संस्थानं थःपिंलिसे न्यादँय् छकः १० प्रतिशत भाः थकायेगु सम्झौता यानातःगु खःसा आः सम्झौताया म्याद हे ल्यं दनिगु इलय् ३५ न्हुया दुने पसः खाली या धकाः पौ छ्वयाहःगु खँ नं वय्कलं कनादिल । गुथि संस्थानया निर्णय विरुद्ध स्थानीय जनतां पुरातत्व विभाग व अख्तियार दुरुपयोग अनुसन्धान आयोगय् नं उजुरी तयेधुंकूगु दु ।

स्थानीयवासीतय्सं धाः कथं उगु छेँया लिउने क्वाःपाः द्यः दुगुलिं उकिया संरक्षण यायेत नं अन व्यापारिक छेँ दने मजिउ । वज्राचार्यं धयादी, ‘थ्व क्षेत्र धइगु पुरातात्विक महत्वं जाःगु क्षेत्र खः अथे जुयाः थनया क्वाःपाः द्यःया संरक्षण यायेत नं ठेक्कां व्यापारिक कम्प्लेक्स दयेके मजिउ ।’

राजु गोर्खालीलिसे याःगु सम्झौता आः तक नं सार्वजनिक मयाःनिसां गुथि संस्थानया हे कर्मचारीतय्सं धाःसा सम्झौताया प्रतिलिपि अन पसः तयाच्वंपिंत उपलब्ध याकेधुंकूगु दु । गुथि संस्थानं याःगु उगु सम्झौताय् प्रथम पक्ष गुथि संस्थान, दोस्रो पक्ष राजु गोर्खाली व तेस्रो पक्ष कथं तालुकदार धकाः लिलाविक्रम शाहया नां तयातःगु दु ।

गुथि संस्थान व लिलाविक्रम शाह दथुइ जूगु मुद्दाय् शाहयात फुक्क थासं बुका हयेधुंकूगु दु । आः वयात हे तालुकदार धाःगुलिं स्थानीयवासीत अजूचायाच्वंगु दु । तालुकदार धइम्ह हे मदयेधुंकाः हानं तालुकदारया नां दुथ्याःगु धइगु हे गुथि संस्थानया षडयन्त्र जूगु आभास याना हःगु दु । गुथि संस्थानयात उगु वायु देवता गुथि छेँ थःपिंसं हे दयेकेगु प्रस्ताव नं अन पसः दुपिं स्थानीयतय्सं तःगु खः ।

तर गुथिं उकियात वास्ता मयासे ठेकेदारयात बीगु धकाः निर्णय याःगु खः । वायुु देवता गुथि छेँय् झिंछखलः पसः दुसा स्वखलः अन हे च्वनेगु यानाच्वंगु दु । पसः व उगु छेँय् च्वंपिं वंगु च्यागू झिगू पुस्ता सिबें न्ह्यवंनिसें अन च्वनाच्वंपिं खः । असं स्वयम् हे छगू पुरातात्विक महत्वं जाःगु थाय् जूगु कारणं आः थुकिया स्वरुप स्यनी कथंया संरचना दयेके मजिउगु खँ स्थानीय वासिन्दातय्सं धयाच्वंगु दु ।

सम्बन्धित बुखँ

LEAVE YOUR COMMENTS