नक्सा भिंकाः निर्माणसम्पन्न बीगु

येँ – येँय् नक्सा अःखः दयेकातःगु छेँयात आः नं नक्सा भिंके बियाः उकिया निर्माण सम्पन्न प्रमाणपत्र बीत महानगरपालिकां तयारी यानाच्वनागु खँ येँ महानगरपालिकाया मेयर विद्यासुन्दर शाक्यं कनादीगु दु ।
नयाँ शक्ति पार्टी येँ जिल्ला कमिटी व येँ महानगर कमिटीं मंकाः कथं बिउगु ज्ञापनपौ लःल्हानाः कासें वय्कलं उगु खँ कनादीगु खः ।
निर्माण सम्पन्न प्रमाणपत्र मदयाः स्थानीय जनतायात समस्या जुयाच्वंगु खँ धासें उकिया समस्या समाधान यायेत थम्हं नीतिगत निर्णय यानागु खँ नं वय्कलं कनादिल । वय्कलं धयादिल ‘निर्माण सम्पन्न मदयाः छेँ बैंकय् तये फयाच्वंगु मदु । न्याये–मी याये फयाच्वंगु मदु । उकिं नीतिगत निर्णय यानाः हे निर्माण सम्पन्न प्रमाणपत्र बीगु प्रक्रिया न्ह्याकेधुनागु दु ।’
येँ महानगर दुने ८० प्रतिशत छेँ मापदण्ड अःखः जूगु धासें अज्याःगु छेँयात आः मापदण्ड दुने लाकाः नक्सा पास याकेगु खँ नं वय्कलं कनादिल ।
आः येँ मनपा दुने आपाः जग्गा मदुगु खँ कनादिसें वय्कलं धयादी, ‘न्हापा येँ दुने आपालं जग्गा दुगु खः आः अज्याःगु जग्गा म्हो जुइधुंकल । न्हापा आपाः जग्गा दुगु इलय् होरिजेन्टल कथं छेँ दनेगु यानाच्वंगु खःसा आः भर्टिकल छेँ दनेमाः व उकिया निंतिं मनपां न्हय्गू च्यागू तल्लाया छेँयात नं नक्सा पास यायेगु यानाच्वनागु दु ।’
स्वनिगःया जनतां न्हापा थम्हं पुलेमाःगु कर गुलि खः धकाः तकं मस्वसे मनपाया कर्मचारीतय्त मिले याना बिउ धकाः ध्यबा नकः जुयाच्वंगु खँ नं वय्कलं कनादिल ।
ज्ञापनपती येँ मनपा दुने जुयाच्वंगु विकास निर्माणया ज्या ठेक्कापट्टा, सामान न्यायेगु आदि फुक्कं ज्याखँया सूचना स्थानीय जनतायात बीमाःगु माग नं यानातःगु दु ।
उकिया लिसलय् मेयर शाक्यं थःपिनिगु खर्च आदि विवरण आः थःपिंसं पिकायेत्यनागु बुलेटिनय् दुथ्याकाः सार्वजनिक यायेगु खँ धयादीगु दु ।

सम्बन्धित बुखँ

LEAVE YOUR COMMENTS