रंगशाला पीडिततय् संघर्ष समिति

ख्वप – थन दयेकेत्यंगु रंगशालां पीडिततय् जूपिनिगु छगू मुँज्यां रंगशाला पीडित संघर्ष समिति गठन याःगु दु । सूर्यविनायक नगरपालिका वडा नं. १० (साविकया चित्तपोल वडा नं. १)य् च्वंगु भकारि लागाय् दयेकेत्यंगु अन्तर्राष्ट्रियस्तया रंगशाला निर्माणं पीडित जूपिं स्थानीयतय् मुँज्यां उकथं संघर्ष समिति गठन याःगु खः ।

स्थानीय शिवशरण कार्कीया संयोजकत्वय् झिंगुम्हेसिया रंगशाला पीडित संघर्ष समिति गठन याःगु खः । समिति गठन लगत्तै हे स्थानीय वडा नं. १०या वडाअध्यक्ष शिवप्रसाद राउटयात नाप लानाः विरोध पत्र नं लःल्हाःगु दु । रंगशाला निर्माणं उगु लागाया कृषि योग्य जमिन नष्ट जुइगु, द्वलंद्वः परिवार विस्थापित जुइमालीगु, बेरोजगार अप्वःगु धासें रंगशाला निर्माण यायेगु निर्णय लित कायेत पहल यायेत समितिं ध्यानाकर्षण याकूगु खः ।

लिसें थःपिंसं न्ह्यब्वयाःगु मागया उचित सुनुवाई मजुल धाःसा स्थानीय जनतां संघर्षय् कुहां वयेगु ख्याच्वः नं संघर्ष समितिं बिउगु दु ।
युवा तथा खेलकुद मन्त्री जगतबहादुर सुनारया नेतृत्वय् वःगु सरकारी पुचलं उगु लागाय् रंगशाला दयेकेत पहल याःगु खः । सरकारी पुचलं उगु लागाय् तत्काल ल्याण्डपुलिङ यानाः रंगशालाया निंतिं प्यंगू किल्लातकं छुटे याःगु खः ।

लिसें जग्गा प्लटिङ, कित्ताकाट, छेँ दनेगु व भिंकेगु ज्या बन्द यानाः खुलाया दुने विस्तृत प्रतिवेदन (डीपीआर) तयार यानाः स्वदँया दुने ज्या क्यचायेकगुकथं प्रक्रिया न्ह्याकेत सरोकारवालातय्त निर्देशन बिउगु खँ पिहां वयेवं पीडिततय्सं संघर्ष समिति गठन यानाः विरोधय् कुहां वःगु खः ।

सम्बन्धित बुखँ

LEAVE YOUR COMMENTS