चाबही–जोरपाटी–सक्व सतकखण्ड मर्मत जुइगु

येँ – चाबही–जोरपाटी–सक्व सतकखण्ड मर्मत याइगु जूगु दु । उगु सतकखण्ड मर्मत यायेगु ज्या जुयामच्वंगुलिं स्थानीयवासी जक मखसे उगु लँपु जुयाः न्हियान्हिथं वये–वने यायेमाःपिंसं तकं तसकं सास्ति फयेमालाच्वंगु खः ।निभाः त्वइगु इलय् तसकं धुफ्वः दनीगु व वा वइगु इलय् नं उतिकं हे ध्याचः जुयाः सास्ति फयेमालाच्वंगु उगु सतकखण्ड आः मर्मत यायेगु ज्या जुइत्यंगु खः ।

थ्व हे वइगु भदौ १२ न्ह्यः हे उगु सतकखण्ड मर्मत याइगु जूगु दु ।नेकपाया वरिष्ठ नेता नापं पुलांम्ह प्रधानमन्त्री माधवकुमार नेपाल, भौतिक, पूर्वाधार व्यवस्था मन्त्री रघुवीर महासेठ लगायतया छगू पुचलं उगु सतकखण्डया स्थलगत निरीक्षण लिपा तत्काल मर्मत यायेगु प्रतिवद्धता प्वंकेवं उगु थासं वये वने यायेमाःपिंत राहत चूलाइगु सम्भावना ब्वलंगु खः ।

प्रधानमन्त्री केपी शर्मा ओलीं नं थ्व स्वयां न्ह्यः वंगु साउन १५ गते सरकारोवाला उच्च सरकारी अधिकारीतय्त स्वनिगः दुनेया निर्माणाधीन सतकखण्ड मर्मत यायेगु व ह्याकिं वनाच्वंगु व गाः ल्हाकेत निर्देशन बियादीगु खः । प्रधानमन्त्रीया निर्देशन लिपा मन्त्री महासेठ व नेता नेपालसहितया छगू उच्चस्तरीय पुचलं उगु सतकखण्डया निरीक्षण याःगु खः ।

चाबहीनिसें सक्वतक करिब १२.५ किलोमीटरया उगु सतक मर्मत यायेगु ज्याय् स्थानीयवासीतय् विरोध याना वयाच्वंगुलिं न्ह्याये मफुगु खः । स्थानीयवासीतय्सं उचित मुआब्जाया माग यासें सतक निर्माणय् पंगः थना वयाच्वंगु खः । उच्चस्तरीय पुचलं इमिगु मागयात नं उचित संबोधन यायेगु प्रतिवद्धता प्वंकूगु दु ।

सम्बन्धित बुखँ

LEAVE YOUR COMMENTS