लोककवि श्रेष्ठया स्मृति दिवसय् चिनाखँ कासा

येँ – लोककवि गणेशलाल श्रेष्ठया १०७ क्वःगु स्मृति दिवसय् वंगु शनिवाः हेटौंडाय् छगू चिनाखँ कासा जुल । नेपालभाषा खलः मकवानपुरया ग्वसालय् जूगु चिनाखँ कासाय् झिंन्हय्म्हेसिनं ब्वति काःगु खः । कासाय् विजय जूपिंत मूपाहां प्रदेश नं. ३ या प्रदेशसभा सदस्य कुमारी मोक्तानं सिरपाः लःल्हानादीगु खः ।

खलःया कार्यवाहक नायः नारायण बहादुर श्रेष्ठया सभापतित्वय् जूगु चिनाखँ कासाय् प्रसिद्धिका लम्साल न्हाप, दुर्गाकुमारी पुडासैनी, पवन शाक्य लियांलिउ व प्रिन्सा प्रधान व नवीन मिश्रं हःपाः सिरपाः त्याकादीगु खः । वय्कःपिंत छसिकथं झिद्वः, न्याद्वः, स्वद्वः व झिन्यासः तका नापं दसिपौ लःल्हाःगु खः ।

खलःया पुलांम्ह न्वकु नन्दरत्न स्थापित, दांभरिं सुमित्रा श्रेष्ठ मानन्धर, सुनकुमार मानन्धर लगायतं नुगःखँ तयादीगु कासाया निर्णायकमण्डलय् साहित्य संगम मकवानपुरया नायः निमेष निखिल, लिउछ्यांजे भावना सापकोटा व गणेशकुमार श्रेष्ठ च्वनादीगु खः । 

ज्याझ्वलय् वरिष्ठ साहित्यकार तुलसी थापा, नेवाः सांस्कृतिक पुचःया न्वकु नारायण राजथला, लोककवि श्रेष्ठया काय केशवलाल श्रेष्ठ लगायत उपस्थिति दुगु खः । खलकं वंगु च्यादँ न्ह्यवंनिसें लोककवि श्रेष्ठया लुमन्तिइ थीथीकथंया साहित्यिक ज्याझ्वः याना वयाच्वंगु दु ।

सम्बन्धित बुखँ

LEAVE YOUR COMMENTS