अन्यथा ….. छुँ ख्वः थें जुइ !

जिमिथाय् लः मवः । थ्व विषयय् उकुन्हुतिनि च्वसु च्वयागु खः । च्वयां छु याये ? जंगल रोदन थें ! हाले । ख्याये । मन हलुका याये । थौंकन्हय् । सुथ न्हापां चाःहिउ वने । मती तये । सुथ न्हापां लँय् धू ब्वइमखु । कुँ ल्ह्वइमखु । वातावरण शान्त जुइ । तर गनया शान्त ! सुथ न्हापां हे लःया ततःग्वःगु ट्यांकरत लँय् खूब खनेदइ ।

लः मदु । मवः । हाला जुइ । ट्यांकरं लः ल्ह्ययाच्वंगु खनी । लःया व्यापार खूब खनेदइ । मनय् खँ लुइ । आः लः नं माफियातय् ल्हाती लायेधुंकल । ट्यांकरया लः न्याइपिंत न्ह्याक्व नं दु । हितिं धाःसा छफुति लः मवः । शायद हितिं लः मवःगु नं लः माफियातय् जगजगिं खः ला ? लःया ट्यांकरत लँय् खनी ।

खुला दत छेँय् लः मवःगु । लुमनी । देय्या संविधानय् दुगु समाजवाद खँग्वः ला थन लःया ट्यांकरं ब्वयेका थकूगु धू, कुँ जुयाः सुथसिया फसय् ब्वयाच्वंगु खनी । लँ धुछिं न्हाय् त्वपुइ । सुथसिया चाःहिलेगु क्वचायेके । धाथें । लः मवःगुया कारण पिनेया नाकाबन्दी खःसा, खूब विरोध यायेगु खः । राष्ट्रवादया चुपि खूब ज्वयेकेगु खः ।

तर छेँय् छेँय् लः मवःगु जःलाखःला देय्या नाकाबन्दीं मखु । देय् दुनेया हे नाकाबन्दीया कारणं खः । आश्चर्य ! छगू हे त्वालय् ल ःगनं वइ । गनं वइमखु । गनं निघौ, स्वघौ वइ । गनं खुला, दछितक छफुति नं वइमखु । यः मयः धइगु दु ला ? मसिउ । छाय् भेदभाव जुइ । न्यने । लः वयेकेगु, मवयेकेगु लः चायेकीपिनि खेल हँ ! थन खयेफु । थ्व ।

तर मनूतय्त मदयेक मगाःगु लखय् गथे थज्याःगु खेल, चलखेल सम्भव जुल ?! दुर्भाग्य ! दुर्दशा ! अराजकता !स्वास्थ्यया ख्यलय् डा. गोविन्द केसी अनसन च्वन । सरकारयात स्वास्थ्य व चिकित्सा शिक्षा क्षेत्रय् सुधारया दबाव बिल । लःया निंतिं नं सुं अनसन च्वनेमाःगु जकं खः ला ? अनसन च्वनीपिं मदु । उकिं सरकारं थुखे चिउताः तइ मखुला ?

अनसन च्वनीम्ह विज्ञ वःसां सरकारं माग पूरा याइ धइगु खँय् छु विश्वास ? लःया निंतिं सुं अनसन च्वंसां अःखः उकी देय्या राजनीतिक अस्थिरता सिर्जना यायेत अराष्ट्रिय तत्वतय् षडयन्त्र खंकी । विदेशी तत्वतय् सरकार विरोधी ‘ग्रायण्ड डिजाइन’ तायेकी । लः फ्वनां छु याये ? लःया खँ गन लाइ गन ! विरोधी राजनीतिक पक्षं सरकार क्वःथलेत संका तःगु धाइ ।

समाजवादी संविधानया नेतातय्सं दावी याना जुइ । देशय् च्वंपिं आम जनतां लःतकं त्वने दुगु स्थिति मदुनि । मवःनि । ग्व सरकार ?
आः मेलम्चीं लः वइ । लः फालाफाल जुइ । लःया समस्या ज्यनी । आम जनतां कथु प्याके दइ । प्याके खनी । सरकारं हल्ला याना जुइ । दँ दँ जुल । लः वइ, वइया भ्रम थनाः जनतायात आशां द्याकाच्वंगु ।

आः मेलम्चीं लः व हे वःसां, स्वनिगःवासीतय् लःया समस्या समाधान जुइ फइमखु । उपत्यकावासीतसें लःया हाहाकार फयांतुं च्वनेमाली । स्वनिगःया जनसंख्याय् वृद्धि जुइधुंकल । अनियन्त्रित रुपं । स्वनिगलय् पिनें दुहां वःपिनिगु चाप अप्वया वनाच्वंगु दु । ख्वपया छम्ह सांसदं धाइ, ‘ख्वपय् न्हूगु नगर दयेकाः छगू करोड जनसंख्याया सहर स्थापित याये !’

अथे हे स्वनिगलय् मेमेगु स्याटेलाइट नगरत दयेकेगु निर्णय जूगु खँ पिहां वइ । स्वनिगःया सीमित पूर्वाधारया चिउताः मतसे, वातावरणीय विनाशया विचाः मयासे न्हू न्हूगु व आधुनिक सहरत दयेकेगु सरकारी योजनाया चर्चा जुयाच्वंगु दु । थुकिं स्वनिगःया मूलवासीतय्त सी–म्वायेया स्थितिइ लाकी ।

मेलम्चीं लः वःसां स्वनिगःया मूलवासीतसं लः त्वने खनी मखु । मेलम्चीं वःगु लः न्हू–न्हूगु सहर वस्तीइ लाकाः यंकी । भू–माफियातय् योजनाकथं स्थापित जुइगु न्हूगु सहरतसें पुलांगु वस्तीइ च्वंपिं मूलवासीतय् अत्यावश्यकीय सुविधा दक्व फुक्क हरण याइ । आवश्यक पूर्वाधारया विचाः मयासे अन्धाधुन्ध विशाल सहर स्थापना यायेगु ज्यां स्वनिगःवासीतय्त म्वाःम्वाकं स्यायेगु षडयन्त्र जुइ । 

न्हू न्हूगु सहरया परिकल्पना याये न्ह्यः स्वनिगःया विद्यमान भौतिक संरचना, पूर्वाधार, वातावरणीय क्षमता छु गथे दु ? गुलितक पाय्छि जुयाच्वंगु दु ? थ्व खँय् विज्ञतय्पाखें सल्लाह कायेमाः । मखुसा थ्व स्वनिगः धइगु छुँ ख्वःथें जक जुइ ।

छेँय् छेँय् लः मवःगु जःलाखःला देय्या नाकाबन्दीं मखु । देय् दुनेया हे नाकाबन्दीया कारणं खः । आश्चर्य ! छगू हे त्वालय् ल ःगनं वइ । गनं वइमखु । गनं निघौ, स्वघौ वइ । गनं खुला, दछितक छफुति नं वइमखु । यः मयः धइगु दु ला ? मसिउ । छाय् भेदभाव जुइ । न्यने । लः वयेकेगु, मवयेकेगु लः चायेकीपिनि खेल हँ ! थन खयेफु ।

सम्बन्धित बुखँ

LEAVE YOUR COMMENTS