धनकुटाय् धिमे व लाखेप्याखं प्रशिक्षण

येँ- झीगु नेवाः समाज धनकुटा, हिलेया ग्वसालय् लछियंकंया धिमे प्रशिक्षण नापं लाखेप्याखं प्रशिक्षण शुरु जूगु दु । समाजया नायः दिजेश शाक्यया सभापतित्वय् जूगु प्रशिक्षण उलेज्याझ्वलय् धनकुटा नगरपालिका वडा नं. १ या वडाअध्यक्ष निरेन तामांग मूपाहांकथं झायादीगु खः ।

लछियंकंया तालिमय् नेवाः समुदायनापं मेमेगु समुदायया यानाः नीन्याम्हेसिनं प्रशिक्षण कयाच्वंगु समाजं जानकारी बिउगु दु । लाखेप्याखंया प्रशिक्षण नेवाः देय् दबू येँपाखें झायादीम्ह प्रशिक्षक धनकृष्ण साजवाः नं बियाच्वनादीगु दु ।

ज्याझ्वलय् नवासें मूपाहां तामांगं थीथी जातजातिया धर्म, संस्कृति, परम्परा संरक्षण व संवद्र्धन याना वनेमाः धासें थुगु प्रशिक्षणं परम्परा, संस्कृति ल्यंकेगु ज्याय् सार्थकता कायेमा धयादिल । लिसें वइगु दिनय् उकथंया प्रशिक्षणया निंतिं वडा ज्याकूपाखें फक्व ग्वाहालि यायेगु नं प्रतिवद्धता नं वय्कलं प्वंकादिल ।

उद्योग वाणिज्य संघया नायः उमेश घिमिरें समाजय् खने दयाच्वंगु जातीय विकृतिया न्हंकेया निंतिं समाजं याना वयाच्वंगु भूमिका च्वछायेबहजू धयादिल वडा सदस्य लालचन गोम्वां सकसिनं थःथःगु मांभासं खँ ल्हायेमाःगु व न्हू पुस्तयात नं थुखेपाखे आकर्षित याना यंकेमाः धयादिल ।

तालिमया प्रशिक्षक साजवां नेवाः समुदाय दुने धिमे बाजंया महत्व कनादिसें थ्व बाजं गबलय् व छुकिया निंतिं थाइ धइगु बारे जानकारी बियादीगु खः ।

सम्बन्धित बुखँ

LEAVE YOUR COMMENTS