गुहेश्वरीया गर्भगृहय् लुँ तनेगु शुरु

येँ- गुहेश्वरी देगःया गर्भगृह दुने च्वंगु अष्टदलय् लुँ तनेगु शुरु जूगु दु । गुहेश्वरी देगःया गर्भगृह दुने च्वंगु अष्टदल नापं भैलःद्यः ख्वाःपाःया मूर्तिइ नं लुँ तनेगु ज्या याःगु खः ।

पशुपति क्षेत्र विकास कोषया सक्रियताय् उकथं लुँ तनेगु ज्या याःगु खः । कोषं वंगु छुं दिं न्ह्यः जक छगू क्षमा पुजा यानाः गुहेश्वरी व भैलःद्यःया ख्वापालय् लुँ तनेगु ज्या याःगु खः । सनतानकालं निसें दुगु उगु लुँया मूर्तिइ ११० तोला लुँ तनेगु ज्या जूगु कोषं न्ह्यथंगु दु ।
वइगु मोहनि स्वयां न्ह्यः हे ज्या सिधेकेगु ल्याखं गुहेश्वरी देगः परिसरय् हे लुँया आवश्यक ज्या यायेत ज्यासः हे दयेकाः ज्या जुयाच्वंगु कोषं न्ह्यथंगु दु । मोहनिया दकलय् लिपांगु न्हि नवरथ वनीपिं गुहेश्वरी द्यःया दर्शन याः वनेगु चलन दु । उकुन्हु दर्शनया निंतिं आपालं भक्तजनत वइगु जूगुलिं मोहनि न्ह्यः हे सिधयेकेगु लक्ष्यं तयाः ज्या न्ह्यानाच्वंगु दु ।

नेपाल प्रहरी व गुहेश्वरीया द्यःपाःलाःया रोहवरय् लुँया ज्या याइपिं लुँकःमितय्सं देगः परिसरय् न्हियान्हिथं लुँया मूर्ति लुँ तनेगु ज्या यानाच्वंगु दु । थुगु ज्याया निंतिं कोषं थगुने हे २२ तोला लुँ न्याःगु खःसा चालु आर्थिक दँय् ७७ तोला लुँ न्यानाः ज्या न्ह्याकागु कोषं जानकारी बिउगु दु । गुहेश्वरी देगःया गर्भगृह दुने च्वंगु अष्टदल व भैलःद्यः ख्वाःपातय् लुँ तनेगु ज्या जूसां उकिया पिनेया घेराय् धाःसा वहया घेरा तइगु जूगु दु । उकिया निंतिं कोषं ८१ लाख तका बजेट विनियोजन यानागु नं जानकारी बिउगु दु ।

गुहेश्वरी देगः दुगु इलंनिसें हे अष्टदल व भैलःद्यःया ख्वाःपाः लुँयागु खः धइगु धापू दु । गुहेश्वरीयात शक्तिपीठया रुपय् कायेगु याना वयाच्वंगु दुसा पृथ्वीइ गुहेश्वरी थेंज्याःगु शक्तिपीठ मेगु मदु धइगु विश्वास दु ।

सम्बन्धित बुखँ

LEAVE YOUR COMMENTS