मांबौ लहिउ वःम्ह केहेँ विरुद्ध दाजुपिनि उजुरी

येँ – येँ महानगरपालिकाया न्यायिक समितिइ थौंकन्हय् दर्ता जुइगु फुक्क उजुरीत मध्ये दकलय् अप्वः वइगु उजुरी छेँय् बालं च्वनाच्वंपिं थने माल धइगु वयेगु यानाच्वंगु दु ।

न्यायिक समितिया संयोजक लिसें उपमेयर हरिप्रभा खड्गी श्रेष्ठं कनादी कथं बालं च्वनीपिंसं इलय् बाः मबिउ, थःत माःबलय् क्वथा त्वःताः मबिउ धइगु उजुरी ज्वनाः वइपिं छेँथुवाःत अप्वयाच्वंगु दु । समितिइ वइगु उजुरीत स्वयेबलय् राजधानीया छेँय् छेँय् पारिवारिक समस्यात नं तसकं तच्वया वनाच्वंगु खनेगु खँ नं वय्कलं कनादिल ।

‘नेपालभाषा टाइम्स’ यात वय्कलं कनादी कथं समितिइ थौंकन्हय् छगू अज्याःगु हे अजूचायापुगु उजुरी नं वयाच्वंगु दु उकी प्यम्ह दाजुकिजां थःछेँय् च्वनाच्वंम्ह छम्ह केहेँयात पितिने माल धकाः निवेदन बियातःगु दु । मांबौयात कायपिंसं मस्वल धकाः बियाछ्वयेधुंकूम्ह म्ह्याय्म्ह छेँय् वयाः मांबौया स्याहार याः वयाच्वंगु जुयाच्वन । थुकिया लागिं उम्ह म्ह्याय्म्हं कया तःगु छकू क्वथा खाली याका बी माल धकाः वया प्यम्ह दाजुकिजां मनपाय् उजुरी तः वःगु खः ।

केहेँम्हेसित पितिनेगु लागिं प्यम्हं दाजुकिजा मिले जुयाः केहेँयात दायेगु ज्या समेत याःगु खँ नं सीदुगु दु । केहेँम्ह छेँया अंश नःवःगु धासें दाजुकिजां पितिनेत स्वयाच्वंगु खः । केहेँम्हं धाःसा दाजुकिजाया सम्पत्ति थःत म्वाः व दाजुकिजां मांबौयात बांलाक स्वःसा थःपिं थःछेँय् वयाः च्वनेमाःगु आवश्यकता मदुगु खँ धायेगु यानाच्वंगु दु । केहेँम्हं थः स्वयम् हे डाक्टर जूगु कारणं थःछेँया सम्पत्ति थःत आवश्यक मजू धासें दाजुकिजां मांबौ मस्वःगु कारणं हे थः थःछेँय् च्वनाः स्वयेत बाध्य जुयाच्वंगु खँ कनेगु यानाच्वंगु दु । ‘जि मचाखाचा भाःत त्वःताः थःछेँय् च्वं वयाच्वनागु दु, यदि जिमि दाजुपिंसं मांबौयात बांलाक स्वःगु खःसा जि छाय् थःछेँय् च्वंच्वनेगु ?’ केहेँम्हेसित उद्धृत यासें उपमेयर खड्कीं कनादिल । बुराबुरी जुइधुंकूपिं मांबौयात दाजुकिजां वास्ता मयाःगुलिं मांबौ दत्तले उमित स्वयेगु थःगु कर्तव्य जूगु दावी केहेँम्हं यानाच्वंगु दु ।

थज्याःगु केशय् मेलमिलाप यायेगु बाहेक थःपिंके मेगु अधिकार मदुगु खँ कँसें उपमेयर खड्गीं स्वक्वः तक उमित मेलमिलाप याकेत स्वयेगु व मिले मजुल धाःसा अदालतय् मुद्दाया निंतिं सिफारिस याना छ्वयेगु खँ कनादिल । स्वनिगलय् बुराबुरि जुइधुंकूपिं मांबौयात कायभौपिंसं मस्वइगु समस्या यक्व दुसां उकियात पिकायेगु ज्या धाःसा मजू ।

सम्बन्धित बुखँ

LEAVE YOUR COMMENTS