आनन्दकुटी विहार निर्माण अन्तिम चरणय्
देय्या दकलय् पुलांगु थेरवादी बौद्ध विहारया रुपय् परिचित थनया स्वयम्भूइ च्वंगु आनन्दकुटी विहार पुनःनिर्माणया ज्या ८० प्रतिशत क्वचायेधुंकूगु दु । २०७२ साल बैशाख १२ गते गोरखा केन्द्र विन्दु जुयाः ब्वःगु तःभुखाय् व वयां लिपाया पराकम्पया कारणं पूर्णरुपं क्षति जूगु विहार श्रीलंका सरकारया आर्थिक ग्वाहालि वंगु निदँ न्ह्यः पुनःनिर्माण शुरु जूगु खः ।
विहारया अप्वःथें भवन संरचना पुनःनिर्माण यायेगु ज्या पूवनेत्यंगु दुसां छुं छुं पूर्वाधार नापं भुखाचं बांमलाक क्षति जूगु श्रीरामलंका चैत्य धाःसा अझं पूवंक थुनाः न्हूगु निर्माण यायेगु क्रमय् दु । लिपांगु इलय् विकास जूगु अत्याधुनिक प्रविधि प्रयोग यानाः भूकम्प प्रतिरोधात्मक यानाः दयेकातःगु विहार संरचना पुनःनिर्माणया ज्या वइगु निला दुने सिधयेकेगु कथं ज्या जुयाच्वंगु विहारं न्ह्यथंगु दु ।
श्रीलंका सरकारं करिब २१ गू करोड लागतय् विहार पुनःनिर्माण यानाच्वंगु खः । आनन्दकुटी विहार विशेष यानाः थेरवादी बौद्ध धर्मावलम्बितय्सं थीथी धार्मिक गतिविधि संचालन यायेगुया नापं बौद्ध उपदेश व दर्शनयात राष्ट्रिय व अन्तर्राष्ट्रिय क्षेत्रय् तकं प्रवद्र्धन यायेगु ज्याय् योगदान बिया वयाच्वंगु अखिल नेपाल भिक्षु महासंघया महासचिव भिक्षु कोण्डन्यं जानकारी बियाबिज्याःगु दु ।
बौद्धधर्मय् समर्पित जूगु कारणं भिक्षु अमृतानन्द महास्थविरयात वि.सं. १९९३ सालय् तत्कालीन राणा सरकारं भोजपुरया छगू जेलय् कुना बीवं वसपोलं उगु विहार निर्माणया अवधारणा तयार यानाबिज्याःगु खः । थाइल्याण्डया बैंककय् मू ज्याकू दुगु विश्व भातृ मण्ढलया उपाध्यक्ष तकं जुयाबिज्याम्ह वसपोलं आनन्दकुटी विहार जक मखसे आनन्दकुटी विद्यापीठ व आनन्दकुटी विहार गुथिया तकं थापना यानाबिज्याःगु खः ।
थौंकन्हय् आनन्दकुटी विहार गुथिं संचालन याना वयाच्वंगु आनन्दकुटी विहारय् भगवान बुद्धया स्वंगू योग चूलाःगु दिं स्वांयाःपुन्हिया लसताय् दँय्दसं सरकार प्रमुख व स्वदँय् छक्वः राष्ट्र प्रमुखया प्रमुख आतिथ्यताय् मुख्य सार्वजनिक ज्याझ्वः यायेगु याना वयाच्वंगु दु । अथे हे बुद्धया पवित्र अस्थि धातुया ब्वज्या व यात्रा नं याना वयाच्वंगु दु ।
वि.सं. १९७५ सालय् पाल्पाया तानसेनय् जन्म जुया बिज्याःम्ह भिक्षु अमृतानन्द महास्थविरं १९९६ सालय् स्थापना यानाबिज्याःगु विहारं देय्या शैक्षिक क्षेत्रय् नं दक्ष जनशक्ति उत्पादन यायेगु उद्देश्यं आनन्दकुटी विद्यापीठ संचालन याना वयाच्वंगुलिं नं विहारं बौद्धधर्मया चिन्तन, मनन व प्रचारप्रसारया नापनापं शिक्षा क्षेत्रया विकासय् नं योगदान बीगुयालिसें महत्वपूर्ण भूमिका म्हिता वयाच्वंगु दु ।
श्रीलंकापाखें साहित्याचार्य व साहित्य चक्रवर्तिया शैक्षिक उपाधिं हासिल याना बिज्याःम्ह भिक्षु अमृतानन्द महास्तविरं बौद्ध धर्म सम्बन्धी प्यंगू दर्जनं मल्याक व नेपालभाषाय् नं निगू दर्जन व अंग्रेजी भासं स्वंगू सफू च्वयाबिज्याःगु दु । वसपोलं बौद्धधर्म सम्बन्धी सपूm च्वयाः यानाबिज्याःगु प्रचारया ज्यां बौद्ध साहित्यया अनुसन्धानय् नं तःधंगु ग्वाहालि जुयाच्वंगु दु ।
यक्वसिनं वसपोलया महानताया वर्णन यानाः सपूm व ग्रन्थ नं च्वःगु दु । वसपोलया सादा जीवन उच्च विचारया माध्यमं सामाजिक रुपान्तरणय् बियाबिज्याःगु तःधंगु योगदानं वसपोल व उगु विहार नेपालय् जक मखसे विश्वया आपालं देशय् नं उलि हे लोकंह्वाः ।
उगु विहारय् थःगु जीवनया ताःई छ्यानाबिज्याःम्ह भिक्षु अमृतानन्द महास्थविर वि.सं. २०४७ साल भदौ ५ गते दिवंगत जुया बिज्यायेधुंकाः नं विश्व शान्तिया निंतिं आः नं विहार प्रतिवद्ध जुयाः न्ह्याः वनाच्वंगु विहारया प्रमुख भिक्षु धम्ममूर्ति महास्थविरं कनाबिज्याःगु दु ।
देशय् थौंकन्हय् थीथी धर्मावलम्बितया लिसें १२५ गू जाति व समुदायया १२३ गू भाय् प्रचलनय् दुगु अवस्थाय् नं थीथी जाति व धर्मालम्बियापिं विहार अवलोकनया निंतिं वयेगु यानाच्वंगु दु ।
स्वयम्भू व्यवस्थापन तथा संरक्षण महासमितिया नायः सर्वज्ञरत्न तुलाधरं विश्व सम्पदाया धलखय् दुथ्यानच्वंगु उगु क्षेत्रय् च्वंगु विहारं सामाजिक सेवा व धार्मिक गतिविधिया माध्यमं मनूतय्त नैतिकताया विकास व समाजय् शान्ति कायम यायेत भूमिका म्हिता वयाच्वंगु विचाः प्वंकादिल । वि.सं. २०१० साल बैशाखय् स्वांयाःपुन्हिया लसताय् जूगु ज्याझ्वलय् तत्कालीन जुजु त्रिभुवनं आनन्दकुटी विहारय् जूगु सार्वजनिक ज्याझ्वःया अध्यक्षता यानादीगु इतिहास दु ।
LEAVE YOUR COMMENTS